სომხეთის პრემიერმინისტრმა ნიკოლ ფაშინიანმა მოქალაქეებს საპარლამენტო არჩევნების შედეგები მიულოცა და განაცხადა, რომ ხალხმა მხარი დაუჭირა მშვიდობას და დაიცვა მომავალი. მან ეს განცხადება პარლამენტში, მისი ადმინისტრაციის 2025 წლის ბიუჯეტის ანგარიშის ერთობლივ კომიტეტის სხდომაზე გააკეთა. მან აღნიშნა, რომ ბლოკი ძლიერი სომხეთი, ბლოკი სომხეთი და პარტია აყვავებული სომხეთი, რომლებიც მან "ომის სამთავიან პარტიად" მოიხსენია, განადგურდნენ. ინფორმაციას სომხური მედია ავრცელებს.

"პირველ რიგში, მინდა მივულოცო სომხეთის რესპუბლიკის მოსახლეობას 2026 წლის 7 ივნისს გამართულ არჩევნებში გამარჯვება. საკუთარი არჩევანით სომხეთის ხალხმა მხარი დაუჭირა სახელმწიფოს, დადგა დამოუკიდებლობის, მომავლის, მშვიდობისა და თავად სომხეთის რესპუბლიკის სადარაჯოზე.

და უნდა აღვნიშნო, რომ ომის სამთავიანი პარტია განადგურებულია. ეს მნიშვნელოვანი, მაგრამ არა საბოლოო შედეგია, რადგან მჯერა, რომ ხალხმა ნათლად გამოხატა თავისი ნება — სამმხრივი ომის პარტია და მასთან არსებული კრიმინალურ-ოლიგარქიული სისტემა სომხეთის რესპუბლიკიდან უნდა აღმოიფხვრას. რა თქმა უნდა, ეს იქნება პოლიტიკური უმრავლესობისა და მთავრობის ერთ-ერთი უმნიშვნელოვანესი დღის წესრიგი, რომელიც დაუყოვნებლივ, ძალიან გადამწყვეტი და მტკიცე ნაბიჯებით უნდა განვახორციელოთ.

ასევე მინდა მივულოცო პარტია სამოქალაქო შეთანხმებას გამარჯვება. სამოქალაქო შეთანხმებას ექნება საპარლამენტო უმრავლესობა და ის ჩამოაყალიბებს მთავრობას, მომავალ თვეებში კი მოგვეცემა შესაძლებლობა, ეს თემა განვიხილოთ", — განაცხადა ფაშინიანმა.

შეგახსენებთ, სომხეთის ცენტრალურმა საარჩევნო კომისიამ საპარლამენტო არჩევნებზე ყველა — 2005-ივე საარჩევნო უბნის ხმების დათვლის წინასწარი შედეგები გამოაქვეყნა.

პრემიერმინისტრ ნიკოლ ფაშინიანის პარტია სამოქალაქო შეთანხმებამ ყველაზე მეტი — 727,160 ხმა (49.81%) მოიპოვა. სემველ კარაპეტიანის ძლიერი სომხეთი მეორე ადგილზეა 340,062 ხმით (23.29%), მას მოსდევს ყოფილი პრეზიდენტის, რობერტ ქოჩარიანის ალიანსი სომხეთი, რომელმაც 145,097 ხმა (9.94%) მიიღო. გაგიკ წარუკიანის პარტიამ აყვავებული სომხეთი 58,368 ხმით მოაგროვა ბარიერის გადასალახად საჭირო 4%.