ჟურნალისტის კითხვაზე — რა ნაბიჯების გადადგმას აპირებთ იმ წუხილებზე, რომელიც ამერიკის შეერთებულ შტატებს აქვს თქვენს მიმართ?, შალვა პაპუაშვილმა დღეს გამართულ ბრიფინგზე განაცხადა, რომ "არ ჰგონია, რაიმე წუხილი, ობიექტური და სამართლიანი წუხილი არსებობდეს საქართველოს მიმართ":

"მე არ მგონია, რომ რაიმე ობიექტური და სამართლიანი წუხილი არსებობდეს საქართველოს მიმართ. კიდევ ერთხელ, ეს ურთიერთობა ამერიკის შეერთებულ შტატებსა და საქართველოს შორის ურთიერთობა გააფუჭა თავად ამერიკის შეერთებული შტატების წინა ადმინისტრაციამ. ბაიდენის ადმინისტრაცია არის დამნაშავე იმაში, რომ ეს ურთიერთობები დღეს არის ისტორიულ დაბალ წერტილში.

და გააფუჭა უსამართლობით. ასე რომ, რაც უსამართლობას გაუფუჭებია, ის სამართლიანობამ უნდა ააშენოს. ეს არის ალბათ ის, რა მოლოდინიც ჩვენ გვაქვს. ასე რომ, ჩვენ გავუზიარებთ ჩვენი ხედვა, გავუზიარეთ ჩვენი დამოკიდებულება, როგორ ვხედავთ ამ ურთიერთობებს, ახლა ჯერი ამერიკის შეერთებული შტატების ადმინისტრაციაზე არის, რომ ჩვენ ვიხილოთ ადეკვატური ნაბიჯები მათ მხრიდან", — თქვა შალვა პაპუაშვილმა.

3 ივნისს, ამერიკელი კონგრესმენის, ჯო უილსონის მიერ საქართველოზე დასმული კითხვის საპასუხოდ აშშ-ს სახელმწიფო მდივანმა მარკო რუბიომ განაცხადა, რომ ქართულ მხარეს "მკაფიოდ განუმარტეს, რა არის საჭირო ამერიკის შეერთებულ შტატებთან ურთიერთობების გასაუმჯობესებლად და იმედოვნებენ, რომ შეძლებენ საქართველოში არსებული მოვლენების განვითარების ტრაექტორიის შეცვლას.

უილსონის თქმით, "პროირანული რეჟიმი და ჩინეთის კომუნისტური პარტია მხარს უჭერენ ქართული ოცნების მთავრობას, რომელიც არალეგიტიმურია. საფრთხეს უქმნის ამერიკის [რეგიონში] წვდომას. საქართველოში ჩატარდა გაყალბებული არჩევნები. ამის გათვალისწინებით, ისინი ხელს უწყობენ ისლამური რევოლუციის გუშაგთა კორპუსს და თავს არიდებენ თეირანზე შემოღებულ სანქციებს თეირანში". კონგრესმენმა რუბიოს ჰკითხა — რა უნდა გაკეთდეს იმისათვის, რომ რეაგირება მოახდინოს აშშ-მა სწრაფად მზარდ რადიკალიზაციაზე, რომელსაც ქართული ოცნების მთავრობა უწყობს ხელს საქართველოში?

სახელმწიფო მდივანი უილსონს დაეთანხმა, რომ მის მიერ ჩამოთვლილი საკითხები მათი შეშფოთების საკითხს წარმოადგენს, მაგრამ მას შემდეგ ქართულმა მხარემ "გადადგა გარკვეული ნაბიჯები, რაც მიანიშნებს, რომ სურთ ამერიკის შეერთებულ შტატებთან ურთიერთობების გაუმჯობესება".

დღეს გამართულ ბრიფინგზე შალვა პაპუაშვილს ჰკითხეს აშშ-ის თავდაცვის ავტორიზაციის აქტის (NDAA) პროექტში საქართველოსთან დაკავშირებით ორი შესწორების შესახებ, რომლის ინიციატორიც კონგრესმენი ჯო უილსონია.

"ჯო უილსონს ვაცადოთ, რომ დატკბეს თავისი ვარსკვლავური, ასე ვთქვათ, მომენტებით, როდესაც ნახევარი საქართველოსთვის ახალი ამბის მატარებელი ხდება ხოლმე. ვაცადოთ ამ ადამიანს, დაიმსახურა საკუთარი პოლიტიკური კარიერიდან და ასაკიდან გამომდინარე. დანარჩენი, ვფიქრობ, რომ სერიოზულად არ უნდა შევხედოთ მის პოლიტიკურ ნაბიჯებს.

რაც შეეხება საქართველოსა და ამერიკის შეერთებულ შტატებს შორის ურთიერთობას, ამას აქვს თავისი ხაზი, მათ შორის ის ვიზიტი, რომელიც უკანასკნელ პერიოდში იყო სახელმწიფო მდივნის წარმომადგენლების ჯგუფის მხრიდან და სადაც იყო ძალიან შინაარსიანი საუბარი, რომელიც ჩვენ გვაძლევს იმის ოპტიმიზმს, რომ ის წუხილები, რომელიც ჩვენ გვქონდა, არის სწორად აღქმული, იქნება გაზიარებული და ჩვენ ვიხილავთ ადეკვატურ ნაბიჯებს ამერიკის შეერთებული შტატების მხრიდან", — თქვა შალვა პაპუაშვილმა.

ცნობისათვის, აშშ-ის თავდაცვის ავტორიზაციის აქტის (NDAA) პროექტში საქართველოსთან დაკავშირებით ორი შესწორება შედის "საქართველოში მოქმედი რუსეთისა და ჩინეთის სადაზვერვო ქსელების" შესახებ. მათი ინიციატორი რესპუბლიკელი კონგრესმენი ჯო უილსონია. ორივე შესწორება წარმომადგენელთა პალატის შეიარაღებული ძალების კომიტეტმა 4 ივნისს დაამტკიცა.