მცირე პაუზის შემდეგ გორგილაძის აუტანელი სიმსუბუქის ახალი სეზონი YouTube-ზე გრძელდება. დათო გორგილაძის საავტორო გადაცემა უცვლელი ფორმატით უბრუნდება აუდიტორიას, რომლის ფარგლებშიც მთავარი გმირები გვიზიარებენ საკუთარ ისტორიებს წარსულზე, დღევანდელობასა და იმ მომავალზე, რომელიც ჯერ მხოლოდ წარმოსახვაში არსებობს.

გადაცემა, რომელიც მაყურებლის დიდი სიყვარულით სარგებლობს, მხოლოდ ერთი სეზონის ფარგლებში გაგრძელდება.

პროექტის წარმდგენი და გენერალური სპონსორი კი კვლავ საქართველოს ბანკია.

გადაცემა, რომელიც პორტრეტის, უშუალო დიალოგისა და ჰარდ თოქის ნაზავია, ახალ სეზონში 7 ეპიზოდს გააერთიანებს და იმ ადამიანებს გაგაცნობთ, რომელთაც საკუთარი გამოცდილებით შეუძლიათ მაყურებელზე გავლენა მოახდინონ, დააფიქრონ ან მოქმედებისკენ უბიძგონ.

აღსანიშნავია, რომ გადაცემის პირველი ეპიზოდი YouTube-ზე უკვე ხელმისაწვდომია. სტუმარი ირინა აფხაიძეა, რომელიც არ გაჩერების, არ დანებების, ჟინისა და მიზანდასახულობის იდეალური მაგალითია.

"მთავარი ყოველთვის ის იყო, რომ ყოველი ეპიზოდის მთავარ პერსონაჟს ჰქონოდა ისეთი სათქმელი, ისეთი მოსაყოლი, რაც მაყურებელში რაიმე დადებით ცვლილებას გამოიწვევდა; ქმედების სურვილს, ფიქრის საბაბს, იდეებსა და ინსპირაციას მისცემდა. ზუსტად ასეთ ხალხს შევახვედრებთ მომდევნო ეპიზოდებში ჩვენს ერთგულ და არა მხოლოდ ერთგულ მაყურებლებს. ცნობისმოყვარე და ჟინიან ადამიანებს“, — აღნიშნავს დათო გორგილაძე

კითხვაზე, თუ რატომ ბრუნდება გადაცემა მხოლოდ ერთი სეზონით, წამყვანი და ავტორი გვპასუხობს:

"ქართულენოვან Youtube-ზე უკვე ძალიან ბევრი პოდკასტია, რომელიც ინტერვიუს კლასიკურ ჟანრს ერგება. თითქოს ერთიანად აზვირთდა ეს ტალღა და ჯერაც არ ჩაუვლია, პირიქით. ხანგრძლივ პაუზის ერთი მიზეზი ესეც იყო — ასე ვთქვათ, პოდკასტების პანდემიაში სახლში დარჩენა.

მე ყოველთვის იმათ რიცხვს მივეკუთვნებოდი, ვინც ფიქრობს, რომ სჯობს მაყურებელს დანაკლისის განცდა დაუტოვო, ვიდრე თავი მოაბეზრო. ამაზე ფიქრმა, ამ ვარაუდის აწონ-დაწონვამაც წაიღო დრო.

და მაინც, მთავარი ალბათ პირველი მიზეზია. მე ასე ვხედავ გორგილაძის აუტანელი სიმსუბუქის მომავალს — არა ხშირად, იშვიათად, მონატრებითა და, რაც მთავარია, ხარისხიანად.“

თითოეული სეზონი და ეპიზოდი ბევრად უფრო დიდ სათქმელს ატარებს, ვიდრე ერთი მორიგი ინტერვიუ კარგად ნაცნობ თუ შედარებით უცნობ სტუმრებთან. რადგან ეს არის გადაცემა, რომელიც არასდროს გაჩერებულა. და რა გასაკვირია, რომ მისი მთავარი მხარდამჭერი საქართველოს ბანკია.

"მარკეტინგის არაჩვეულებრივ გუნდთან თანამშრომლობა, თავიანთი საქმის ნამდვილ პროფესიონალებთან იდეების, გამოცდილების, ხედვისა და ცოდნის გაცვლა-გამოცვლასაც მოიცავს. თან, სრული სარედაქციო დამოუკიდებლობის ფონზე და ეს მაგარია.“ — ამბობს დათო გორგილაძე.

ისღა დაგვრჩენია, დაველოდოთ თითოეული ეპიზოდის გამოსვლას YouTube-ზე, მოვისმინოთ ისტორიები, რომლებიც ერთდროულად წარსულზე და მომავალზე დაგვაფიქრებს, და მოგვცემს მოტივაციას, რომ არ გავჩერდეთ.

პირველი ეპიზოდის სანახავად, ეწვიეთ ბმულს.