"მივმართოთ საფრანგეთის პროკურატურას, საფრანგეთის მოქალაქე ბიძინა ივანიშვილის საერთაშორისო კონვენციური დანაშაულების ჩადენისთვის პასუხისგებაში მისაცემად" — განაცხადა პარტიის კოალიცია ცვლილებებისთვის ლიდერმა, ნიკა გვარამიამ საფრანგეთის ეროვნული ასამბლეის მიერ მიღებული რეზოლუციის თაობაზე. ინფორმაციას ამის შესახებ გვარამია სოციალურ ქსელში ავრცელებს.

პარტიის ლიდერის თქმით, საფრანგეთის ეროვნული ასამბლეის ქვედა პალატის მიერ მიღებული რეზოლუცია გმობს საქართველოს მთავრობის "არალიბერალურ და ავტორიტარულ რეგრესს" და ხაზს უსვამს ბიძინა ივანიშვილის ნეგატიურ გავლენას ქვეყნის პოლიტიკურ ინსტიტუტებზე. მისივე განცხადებით, დოკუმენტი ასევე შეიცავს მოწოდებას, რომ საფრანგეთის მთავრობამ განიხილოს ივანიშვილისთვის ადრე მინიჭებული საპატიო ლეგიონის ორდენის ჩამორთმევის საკითხი.

"მოვიდა დრო, მივმართოთ საფრანგეთის პროკურატურას, საფრანგეთის მოქალაქე ბიძინა ივანიშვილის საერთაშორისო კონვენციური დანაშაულების ჩადენისთვის პასუხისგებაში მისაცემად.

გუშინ, საფრანგეთის ეროვნული ასამბლეის ქვედა პალატამ მიიღო რეზოლუცია, რომლითაც:

გმობს საქართველოს მთავრობის "არალიბერალურ და ავტორიტარულ რეგრესს" და ხაზს უსვამს ივანიშვილის ნეგატიურ გავლენას ქვეყნის პოლიტიკურ ინსტიტუტებზე;

რეზოლუცია შეიცავს მოთხოვნას, რომ საფრანგეთის მთავრობამ განიხილოს ბიძინა ივანიშვილისთვის ადრე მინიჭებული საპატიო ლეგიონის ორდენის ჩამორთმევის საკითხი;

ასამბლეა მხარს უჭერს საქართველოს ევროკავშირში გაწევრიანების პროცესის დე ფაქტო შეჩერებას მანამ, სანამ ქვეყანა არ დაუბრუნდება დემოკრატიულ ღირებულებებს და არ ჩატარდება საერთაშორისო სტანდარტების შესაბამისი არჩევნები," — წერია განცხადებაში.

ცნობისთვის, საფრანგეთის ეროვნულმა ასამბლეამ 11 მაისს მიიღო რეზოლუცია, რომელიც საფრანგეთის მთავრობას ბიძინა ივანიშვილისა და მისი გარემოცვის წინააღმდეგ ინდივიდუალური სანქციების დაწესებისკენ მოუწოდებს.