რუსეთის ბუნებრივი რესურსებისა და გარემოს დაცვის მინისტრის ყოფილმა მოადგილემ, დენის ბუცაევმა რუსეთი სისხლისსამართლებრივი დევნის საფრთხის გამო დატოვა.

რუსული გამოცემა "ვედომოსტი" სამ წყაროზე დაყრდნობით იუწყება, რომ უცაევმა რუსეთი გადადგომის შემდეგ დატოვა. გამოცემა წერს, რომ მან ქვეყანა 23 აპრილს მინსკის გავლით დატოვა. პრემიერმინისტრმა მიხაილ მიშუსტინმა გადადგომის შესახებ ბრძანებას ხელი 22 აპრილს მოაწერა.

Faridaily მთავრობასთან დაახლოებულ ორ წყაროზე დაყრდნობით, ბუცაევის წასვლის დროის განსხვავებულ ვერსიაზე წერს. მათი ინფორმაციით, მინისტრის მოადგილე რუსეთიდან 18 აპრილს წავიდა და ბელორუსიისა და საქართველოს გავლით აშშ-ში გაემგზავრა.

"[ბუცაევს] გაუმართლა, რომ ჰყავდა მეგობრები, რომლებმაც დროულად გააფრთხილეს", — ციტირებს Faridaily ერთ-ერთ წყაროს და მის ქვეყნიდან წასვლას "ელიტების წინააღმდეგ რეპრესიების ტალღის დაწყების შემდეგ სისხლის სამართლის დევნის საფრთხეს" მიაწერს.

"ბუცაევის წასვლა პირველი ცნობილი შემთხვევაა, როდესაც მთავრობის წარმომადგენელი ქვეყნიდან გაიქცა ბოლო ორი წლის განმავლობაში ელიტის წინააღმდეგ რეპრესიების გაძლიერების დროს", — წერს Faridaily.

"ვედომოსტის" ცნობით, აპრილის ბოლოს "რამდენიმე ანონიმურმა Telegram-ის არხმა" გაავრცელა ინფორმაცია რუსეთის გარემოსდაცვითი ოპერატორის (REO) ადმინისტრაციული დირექტორის, იური ვალდაევის წინააღმდეგ სისხლის სამართლის თაღლითობის საქმის შესახებ; 24 აპრილს იგივე ინფორმაცია გაავრცელა არხმა "კომპრომატ ჯგუფმა".

"ვედომოსტის" ერთ-ერთმა წყარომ დაადასტურა ვალდაევის წინააღმდეგ საქმის არსებობა, ხოლო მეორემ განაცხადა, რომ გამომძიებლებმა ასევე აღძრეს საქმეები REO-ს სხვა ტოპ მენეჯერების — ეკატერინა სტეპკინას და მაკიმ შჩერბაკოვის წინააღმდეგ.

ბუცაევი ბუნებრივი რესურსების სამინისტროში მუშაობამდე REO-ს გენერალური დირექტორი იყო. "ვედომოსტის" წყაროს ცნობით, ის "მოხსენიებულია" კომპანიის ტოპ მენეჯერების წინააღმდეგ აღძრულ სისხლის სამართლის საქმეებში.