6 აპრილს თავდაცვის კომიტეტის სხდომაზე "თავდაცვის კოდექსსა" და "საქართველოს მოქალაქეების საქართველოდან გასვლისა და საქართველოში შემოსვლის წესების შესახებ" კანონში ცვლილებებს პირველი მოსმენით განიხილავენ — ინფორმაციას რადიო თავისუფლება ავრცელებს.

ცვლილებების მიხედვით, ჩაბარებულად ჩაითვლება ჯარში გაწვევის უწყება, რომელიც გაწვევაზე პასუხისმგებელი ორგანოს საიტზე გამოქვეყნდება. რაც იმას ნიშნავს, რომ საზღვარგარეთ დროებით წასული წვევამდელი ვალდებული იქნება უწყების გამოქვეყნებისთანავე საქართველოში დაბრუნდეს და გაწვევის კომისიაში გამოცხადდეს.

"პირი ვალდებული იქნება შეტყობინების/უწყების ოფიციალურად ჩაბარებიდან 10 კალენდარული დღის ვადაში, გამოცხადდეს წვევამდელის სამხედრო აღრიცხვის/წვევამდელთა ეროვნულ სამხედრო სამსახურში გაწვევაზე უფლებამოსილ ორგანოში," — ვკითხულობთ კანონის განმარტებით ბარათში.

ცვლილებებით ასევე განისაზღვრება ის ოჯახის წევრები, რომლებისთვისაც უწყების ჩაბარება შესაძლებელი იქნება.

"საქართველოს მოქალაქეების საქართველოდან გასვლისა და საქართველოში შემოსვლის წესების შესახებ" საქართველოს კანონის მე-18 მუხლის პირველი პუნქტში შევა ტექნიკური ცვლილება და სიტყვები "სათანადო შეტყობინების მიღებისთანავე" შეიცვლება სიტყვებით: "სათანადო შეტყობინების/უწყების ჩაბარებისთანავე," — ვკითხულობთ კანონის განმარტებით ბარათში.