ადგილობრივი თვითმმართველობის არჩევნებისთვის პოლიტიკური პარტიების დაფინანსების შესახებ საერთაშორისო გამჭვირვალობა-საქართველოს შუალედურ კვლევაში ნათქვამია, რომ პირველი ივნისიდან პირველ ოქტომბრამდე მთლიანი შემოწირულებების 93% მმართველმა პარტიამ მიიღო.

TI-ის ანგარიშის თანახმად, კვალიფიციურმა საარჩევნო სუბიექტებმა და თბილისის მერობის დამოუკიდებელმა კანდიდატმა ალექსანდრე ელისაშვილმა მთლიანობაში 10 319 998 ლარის ოდენობის შემოწირულობა მოიზიდეს. აქედან, 8 274 776 ლარი (80%) 643 ფიზიკური პირის მიერ გაღებული თანხაა, ხოლო 2 044 143 ლარი - 32 იურიდიული პირის მიერ.

აღნიშნული თანხა შემდეგნაირად გადანაწილდა:

  • ქართული ოცნება - დემოკრატიული საქართველო - 9 553 178 ლარი (93%);
  • ევროპული საქართველო-მოძრაობა თავისუფლებისთვის - 609 969 ლარით;
  • ერთიანი ნაციონალური მოძრაობა - 48 261 ლარი;
  • პატრიოტთა ალიანსი - 28 187 ლარი;
  • ალექსანდრე ელისაშვილი - 20 241 ლარი.

ანგარიშის თანახმად, 32 იურიდიული პირიდან 31 კომპანია ქართული ოცნების შემომწირველია და მხოლოდ ერთმა იურიდიულმა პირმა გაიღო პატრიოტთა ალიანსის სასარგებლოდ შემოწირულება 90 ლარის ოდენობით.

ყველაზე მსხვილი შემომწირველი შვიდი კომპანია იყო, რომლებმაც ქართულ ოცნების სასარგებლოდ მაქსიმალური თანხა 120 ათასი ლარი გაიღო. ეს კომპანიებია:

  • შპს ჯი-ემ-პი;
  • შპს კახური ტრადიციული მეღვინეობა;
  • შპს LION;
  • თეგეტა მოტორსი;
  • დეტი;
  • პარტნიორი;
  • მეეკი.

TI-ის მოპოვებული მონაცემებით, მათ საანგარიშო პერიოდში თეგეტა მოტორსმა, როგორც იურიდიულმა პირმა მმართველ პარტიას 120 000, ხოლო ამ კომპანიის მეწილემ ზაურ ცხადაძემ დამატებით 60 000 ლარი შესწირა, სანაცვლოდ კი ამ კომპანიამ მიმდინარე წლის განმავლობაში მხოლოდ გამარტივებული სახელმწიფო შესყიდვის წესით დაახლოებით 1 500 000 ლარის საერთო ღირებულების 1 539 კონტრაქტი გააფორმა.

რაც შეეხება ანგარიშში ნახსენებ ფიზიკურ პირებს, 643 შემომწირველიდან 289 ადამიანი 818 იურიდიულ პირთან იყო სხვადასხვა სტატუსით დაკავშირებული.ხოლო, ამ 818 იურიდიული პირიდან 70 არის ისეთი, რომელმაც 2017 წელს გამარტივებული წესით სახელმწიფო შესყიდვების ერთი კონტრაქტი მაინც მიიღო.