აჭარის უმაღლესი საბჭოს თავმჯდომარემ, დავით გაბაიძემ თანამდებობა დატოვა. ამის შესახებ მან ბრიფინგზე განაცხადა.

მისი განმარტებით, ამ გადაწყვეტილების მიღებამდე გუნდთან კონსულტაციები ჰქონდა. მისივე თქმით, გადაწყვეტილების მიღების მოტივაცია ის იყო, რომ უკვე ათი წელია ამ თანამდებობას იკავებს და ცვლილების დრო დადგა.

მან ასევე ისაუბრა მისი და აჭარის ავტონომიური რესპუბლიკის მთავრობის ყოფილი თავმჯდომარის, თორნიკე რიჟვაძის ნათესაობასთან გაჩენილ კითხვებთან დაკავშირებით და აღნიშნა, რომ თორნიკე რიჟვაძის "მოსვლამდეც" იყო თავმჯდომარე და ამ ორი ფაქტის დაკავშირება სწორი არ არის.

დავით გაბაიძის თქმით, გარკვეული პერიოდი უმაღლეს საბჭოში მოუწევს ყოფნა და შემოთავაზებები აქვს გუნდიდანაც. მისი განმარტებით კონკრეტული გადაწყვეტილების მიღებამდე ოჯახის წევრებთან უნდა გაიაროს კონსულტაციები.

"ამაზე დიდი ხანია ვფიქრობ. გუნდთან მქონდა კონსულტაციები, რომ ეს გადაწყვეტილება უნდა მიმეღო. ჩვენ ამაზე ვმსჯელობდით. მოტივაცია ერთადერთია, არასრული ათი წელია ამ თანამდებობაზე ვარ, ნამდვილად დადგა ის დრო, რომ ჩემს ცხოვრებაში რაღაც შეიცვალოს.
აქ სიტყვა "კლანი" არ არის ის ტერმინი, რომელიც უნდა გამოვიყენო. თორნიკე რიჟვაძის მოსვლამდე ვიყავი თავმჯდომარე, ამ ორი ფაქტის დაკავშირება არა მგონია სწორი იყოს.
ამ ეტაპისათვის, ბუნებრივია რაღაც პერიოდი უმაღლეს საბჭოში მომიწევს ყოფნა, ჩვენი გუნდიდანაც მაქვს შემოთავაზებები, მაქვს რაღაც გადაწყვეტილებები და ეს კონსულტაციები ოჯახთან უნდა გავიარო.

ჩემი შემცვლელი შეიძლება იყოს უმრავლესობის ნებისმიერი წევრი. ყველა ღირსეულია, გუნდმა უნდა გააკეთოს, უმრავლესობამ უნდა გადაწყვიტოს, თუკი ეს ცოტნე ანანიძე იქნება, მივესალმები მის კანდიდატურას", —განაცხადა დავით გაბაიძემ ბრიფინგზე. მის სიტყვას IPN ავრცელებს.

გაბაიძემ ბრიფინგზე აღნიშნა ისიც, რომ თორნიკე რიჟვაძე მკურნალობს და სტაბილურად არის.

"ბატონი თორნიკე, ღმერთს მადლობა, ჯანმრთელად არის. მკურნალობის ეტაპს გადის. პერიოდულად მისი მეუღლეს ვუკავშირდები. გამოძიება გრძელდება", — თქვა დავით გაბაიძემ (IPN).

არსებული ინფორმაციით, აჭარის უმაღლესი საბჭოს თავმჯდომარის პოზიციაზე, აჭარის უმაღლესი საბჭოს წევრს "ქართული ოცნებიდან" — ცოტნე ანანიძეს განიხილავენ.

შეგახსენებთ, 2025 წლის 7 ივლისს, საგარეჯოს "ჯეოჰოსპიტალსში" აჭარის ავტონომიური რესპუბლიკის მთავრობის ყოფილი თავმჯდომარე თორნიკე რიჟვაძე შეიყვანეს, რომელსაც გულმკერდის არეში ცეცხლნასროლი ჭრილობა აღენიშნებოდა. შინაგან საქმეთა სამინისტროში გამოძიება სისხლის სამართლის კოდექსის 115-ე მუხლით არის დაწყებული, რაც თვითმკვლელობამდე მიყვანას გულისხმობს.