პროევროპული აქციების აქტიურ მონაწილეს, ლაშა კაციას გზის გადაკეტვის ბრალდებით 4-დღიანი პატიმრობა შეეფარდა.

აქტივისტს ნიკა კაციას განცხადებით, მისი ძმა ზესტაფონის იზოლატორშია გადაყვანილი.

"რას ედავებოდნენ ამასთან დაკაშირებით არ ვსვამ კითხვას, იმიტომ, რომ ძირითადად ყველას უკვე ასე უსამართლოდ აკავებენ. ეს გრძელდება დიდი ხანია და მას შემდეგ რაც 4 შვილის დედას მიუსაჯეს 1 წელი და 6 თვე ნამდვილად არაფერი არ მაქვს სათქმელი. ჩემი პირადი ისტორიის და დანარჩენი რეჟიმის ტყვეების ისტორიის მერეც ნამდვილად არაფერი არ მაქვს სათქმელი. თან წაიყვანეს ზესტაფონში. გაწვალებენ, რომ ვერ წახვიდე ზესტაფონში. ვერ მიუტანო პირადი საჭროების ნივთები," — განაცხადა ნიკა კაციამ ტვ პირველთან საუბრისას.

შეგახსენებთ, 16 ოქტომბერს პარლამენტმა შეკრება-მანიფესტაციებთან დაკავშირებული წესების გამკაცრების კანონპროექტი დაჩქარებული წესით მიიღო. ცვლილების მიხედვით, შეკრების მონაწილეების შსს-ს მიერ შეთავაზებულ ადგილზე შეკრების ან მანიფესტაციის ჩატარების შემთხვევაში, თუ შეკრებას მაინც იმ ადგილზე ჩაატარებენ, მონაწილეებს დაეკისრება პატიმრობა 15 დღემდე ვადით, განმეორებისას — პატიმრობა 1 წლამდე ვადით.