13 მარტს, BBC-მ სტატია გამოაქვეყნა, სადაც წერს, რომ საქართველოს რაგბის ნაკრების ექვსი მოთამაშე და გუნდის კიდევ 1 წევრი ანტიდოპინგური წესების დარღვევისთვის დაასანქცირეს, რასაც "მსოფლიო რაგბი "ორგანიზებულ სქემას“ უწოდებს.

"მსოფლიო რაგბისა" და მსოფლიო ანტიდოპინგური სააგენტოს (WADA) ერთობლივი გამოძიების შედეგად გამოვლინდა სქემა, რომელიც გულისხმობდა ნიმუშის სავარაუდო შეცვლასა და დოპინგ-ტესტების ჩატარების შესახებ წინასწარ გაფრთხილებებს.

"ოპერაცია ობსიდიანის" სახელით ცნობილი გამოძიება 2023 წელს დაიწყო და აღმოაჩინეს ხუთი შემთხვევა, როდესაც მოთამაშეები, სავარაუდოდ, შარდის ნიმუშებს ცვლიდნენ.

WADA-ს განცხადებაში ნათქვამია, რომ საქართველოს ეროვნული ანტიდოპინგური სააგენტოს (GADA) თანამშრომლებმა ასევე აცნობეს მოთამაშეებს მომავალი ტესტირების შესახებ, დოპინგ-კონტროლის ოფიცრები სათანადოდ არ აკვირდებოდნენ სპორტსმენებს ტესტირების დროს და არ ესწრებოდნენ შარდის შეგროვებას.

"მსოფლიო რაგბის" განცხადებაში ეს მოხსენიებულია, როგორც "ორგანიზებულ სქემა, რომელიც გულისხმობდა რეკრეაციული ნარკოტიკების გამოყენებას და ნიმუშის ჩანაცვლებას". მათივე თქმით, შვიდი ადამიანი ბრალდებულია და სანქციები დაეკისრა.

ჩართული პირები არ არიან დასახელებულნი და "მსოფლიო რაგბიმ" განაცხადა, რომ "ვერ გააკეთებენ დამატებით კომენტარს მანამ, სანამ არ დასრულდება სრული დისციპლინური პროცესი და შედეგები და სანქციები არ გამოქვეყნდება“.

მათი ცნობით, გამოძიება "დაიწყო მას შემდეგ, რაც მსოფლიო რაგბის სპორტსმენთა პასპორტების მართვის პროგრამამ, რომელიც 2023 წლის მამაკაცთა რაგბის მსოფლიო თასამდე ხანგრძლივ პერიოდს მოიცავდა, შარდის ნიმუშებში დარღვევები გამოვლინდა".

საქართველო საფრანგეთში თავის ჯგუფში ბოლო ადგილზე გავიდა და ოთხი თამაშიდან ვერც ერთი ვერ მოიგო.

WADA-მ დასძინა, რომ ამჟამად სხვა სპორტის სახეობებში მონაწილე ქართველი სპორტსმენების ნიმუშებს ამოწმებს.

"ის, რაც ქართულ რაგბიში ხდებოდა, აღმაშფოთებელია და შოკს გამოიწვევს ქართულ სპორტსა და მთავრობაში, ასევე გლობალურ ასპარეზზე", — განაცხადა WADA-ს პრეზიდენტმა ვიტოლდ ბანკამ. "ამით ამბავი არ სრულდება, რადგან ახლა ქართული სპორტის უფრო ღრმად შესწავლა მიმდინარეობს. WADA-მ დაკარგა ნდობა GADA-ს ანტიდოპინგური პროგრამის მიმართ და ახლა შესაბამისმა ორგანოებმა უნდა განახორციელონ საყოველთაო ცვლილებები", — დასძინა მან.