12 მარტს, ერაყის წყლებში, ბასრასთან ახლოს, ორი ნავთობტანკერი დაბომბეს. BBC-ის ცნობით, ადგილობრივი დროით 01:30 საათზე, ერაყის სანაპიროდან ხუთი საზღვაო მილის დაშორებით, ჩრდილოეთ ყურეში, ტანკერებს "უცნობი ჭურვი დაეცა".

პირველი, Safesea Vishnu, აშშ-ის საკუთრებაშია და მარშალის კუნძულების დროშის ქვეშ დაცურავს, იტყობინება გემების თვალთვალის ვებსაიტი Marine Traffic. ის ინდოეთისკენ მიემართებოდა.

მეორე, Zefyros, საბერძნეთის საკუთრებაშია და მალტის დროშის ქვეშ მცურავს და ერაყის სხვა პორტისკენ მიემართებოდა, განაცხადეს ოფიციალური პირებმა.

"რადიო თავისუფლების" ცნობით, ნავთობტანკერ Zefyros-ზე, რომელზეც თავდასხმის შედეგად ხანძარი გაჩნდა, 23 ქართველი მეზღვაური იმყოფებოდა. ყველა მათგანი უსაფრთხოდაა.

"ბათუმელები" დაუკავშირდა გემზე მყოფი ერთ-ერთი მეზღვაურის მეუღლეს, რომელმაც გვითხრა, რომ როგორც მისი ქმარი, ისე სხვა მეზღვაურები უსაფრთხოდ არიან.

დიდი ბრიტანეთის საზღვაო ვაჭრობის დეპარტამენტის ცნობით, ორივე გემზე დარტყმის შემდეგ ხანძარი გაჩნდა, რის შემდეგაც ეკიპაჟის ყველა წევრის ევაკუირება მოხდა.

ერაყის საინფორმაციო სააგენტო სამხედრო ოფიციალურ პირზე დაყრდნობით იუწყება, რომ ეკიპაჟის 38 წევრი გადარჩა და ერთი ადამიანი გარდაიცვალა.

ერაყის პორტების გენერალური კომპანიის (GCPI) გენერალური დირექტორი აცხადებს, რომ ნავთობტერმინალებში ოპერაციები შეჩერებულია, მაგრამ კომერციული პორტები კვლავ ფუნქციონირებს.

BBC წერს, რომ არაბთა გაერთიანებული საამიროების სანაპიროსთან კიდევ ერთ გემზე განხორციელდა თავდასხმა.

ადგილობრივი დროით 06:19 საათზე (02:19 GMT), დიდი ბრიტანეთის სატრანსპორტო დეპარტამენტი აცხადებდა, რომ მან მიიღო შეტყობინება კონტეინერმზიდ გემზე "უცნობი ჭურვის დარტყმის შესახებ, რამაც გამოიწვია მცირე ხანძარი გემზე", არაბთა გაერთიანებული საამიროების სანაპიროდან დაახლოებით 35 საზღვაო მილის დაშორებით — ჰორმუზის სრუტესთან ახლოს. ეკიპაჟის ყველა წევრი უსაფრთხოდაა.

ორივე დარტყმის მიზეზი გამოძიების პროცესშია.