ოცნების პარლამენტის თავმჯდომარე შალვა პაპუაშვილი დიდი ბრიტანეთის მიერ პროსამთავრობო პროპაგანდისტული ტელეკომპანია იმედის დასანქცირებას 105 წლის წინანდელ საბჭოთა ოკუპაციას ადარებს.

ამას გარდა, პაპუაშვილი აცხადებს, რომ უკრაინა "ზეკორუმპირებულია" და "ერთმანეთის დაჭერაზე არიან გადასული".

"105 წლის წინ რუსეთი თავს დაესხა თავისუფალ ქართულ სახელმწიფოს, 105-ე წლისთავზე ბრიტანეთი თავს დაესხა თავისუფალ ქართულ მედიას.

მე მგონი, ეს პარალელი ძალიან ცხადია და ცხადია მისი შინაარსიც.

რუსეთი 105 წლის წინ თავს დაესხა საქართველოს იმიტომ, რომ ჩვენი სახელმწიფო არ მოსწონდა და უნდოდა შეეჩერებინა ჩვენი სახელმწიფოს არსებობა ხოლო ბრიტანეთი თავს დაესხა თავისუფალ ქართულ მედიას იმისთვის, რომ თავისუფელი სიტყვა შეაჩეროს. ეს არის მთავარი საკითხი. თქვენ რა გგონიათ? ნუ აღარ ვიტყვი იმ შინაარსზე, რაც ჰქონდა მათ განმარტებაში, აბსოლიტური სისულელე, როგორ თუ ტელევიზიაში ითქვა, რომ უკრაინა არის კორუმპირებული სახელმწიფო. დიახაც, კორუმპირებული კი არა ზეკორუმპირებულია, ერთმანეთის დაჭერაზე არიან გადასული.

რაც შეეხება მიზეზებს, ბრიტანეთს დეზინფორმაცია აბსოლუტურად არ ანაღვლებს.
გეტყვით რატომ, ბრიტანეთში თავს აფარებს კეზერაშვილი, ფორმულას პატრონი და ხაზარაძე ტვ პირველის პატრონი და დამფინანსებელი, ორი ყველაზე პროპაგანდისტულ-დეზინფორმაციული ტელეკომპანიის, პარტიული მედიის მფლობელები უზის თავისთან," — განაცხადა შალვა პაპუაშვილმა.

შეგახსენებთ, დიდმა ბრიტანეთმა, რუსეთის სანქციების რეგულაციების ფარგლებში, სამთავრობო პროპაგანდისტული "იმედი" და "პოსტვ" 24 თებერვალს დაასანქცირა.

სანქცირებული კომპანიების ჩამონათვალს დიდი ბრიტანეთის საგარეო თანამეგობრობისა და განვითარების ოფისი აქვეყნებს. მათ მიერ გავრცელებული დოკუმენტის მიხედვით, საგარეო საქმეთა სამინისტრო მიიჩნევს, რომ ტელეკომპანია "იმედი" განზრახ ავრცელებს შეცდომაში შემყვან ინფორმაციას რუსეთის უკრაინაში სრულმასშტაბიანი შეჭრის შესახებ, რაც მხარს უჭერს ან ხელს უწყობს პოლიტიკას ან ქმედებას, რომელიც დესტაბილიზაციას ახდენს უკრაინაში ან ძირს უთხრის ან საფრთხეს უქმნის უკრაინის ტერიტორიულ მთლიანობას, სუვერენიტეტს ან დამოუკიდებლობას. კერძოდ, ის რეგულარულად ავრცელებს ისეთ შინაარსის ინფორმაციას, რომ უკრაინის მთავრობა და პრეზიდენტი ზელენსკი არალეგიტიმურია, უკრაინა არის დასავლეთის "მარიონეტი", უკრაინა არის კორუმპირებული ქვეყანა და რომ უკრაინა და დასავლეთი ცდილობენ საქართველოს დესტაბილიზაციას.