პარტიზანი მებაღე და სამოქალაქო აქტივისტი, ნატა ფერაძე თბილისის მერობის დამოუკიდებელ კანდიდატს, ალეკო ელისაშვილის მხარს აღარ უჭერს. როგორც ფერაძე ამბობს, მან არჩევანი არჩევნებამდე რამდენიმე დღით ადრე შეცვალა. ფერაძე გადაწყვეტილების შეცვლის მიზეზებზე On.ge-ს ესაუბრა.

მისი თქმით, ის ელისაშვილის აქტიური მხარდამჭერი იყო და ანაზღაურებადი სამსახური კამპანიაში ჩართვის მიზეზით დატოვა. თუმცა, მოგვიანებით, როცა მისი მისამართით ინტერნეტში მასალები გავრცელდა, რომლის მიზანიც ელისაშვილის დისკრედიტაცია იყო, მერობის კანდიდატმა უარყოფითად აღიქვა. ფერაძე ამბობს, რომ გარდა ამ საკითხისა, ელისაშვილის შტაბში სიარულის დროს სხვა პრობლემებიც შენიშნა.

"გუნდის წევრობას პოლიტიკურად რას ჰქვია არ ვიცი, მაგრამ მე არ ვაპირებდი არანაირ თანამდებობზე მერიაში მუშაობს. თუმცა მე ვთვლიდი, რომ მე ვიყავი ალეკო ელისაშვილის გუნდის წევრი, მაგრამ არცერთი ჩემი და პარტიზანი მებაღეების შენიშვნები არ გაითვალისწინა კადრების შერჩევასა და სტრატეგიის დაგეგმვაში", - ამბობს ფერაძე, რომელიც დასძენს, რომ მერობის კანდიდატი სხვა მიმართულებითაც არ ითვალისწინებს პროფესიონალების რჩევებს.

ყოფილი მხარდამჭერი ფიქრობს, რომ ელისაშვილი საკითხს პოპულისტურად მიუდგა.

"იგივე დაპირებაა გამწვანების გაოთხმაგება, რაც [დავით] ნარმანიას [თბილისის მოქმედი მერი] მილიონი ხე იყო. უარესი, ნარმანია ამასაც არ დაგვპირებია, არარეალურია, რომ თბილისში გამწვანება გაოთხმაგდეს", - ამბობს ფერაძე.

ის ელისაშვილის მიერ საარჩევნო კამპანიის დროს ხეების მოჭრასთან დაკავშირებულ განცხადებებსაც ეხმიანება. ფერაძის თქმით, ქალაქის განვითარებისთვის ხეების მოჭრა არ გამოირიცხება, თუმცა მსგავსი ქმედება სწორი სტრატეგიით უნდა იყოს გათვალისწინებული.

"მისი დაპირებები ნარმანიაზე გაცილებით არარეალურია და მოწყვეტილია რეალობას... ერთხელ უკვე იძახა ნარმანიამ, რომ მილიონ ხეს დავრგავო და მისცეს ბედნიერებმა ხმა და ვნახეთ, რომ მილიონი ხე არ არის. მეორედ, როცა ტიპი იძახის, რომ მე გავაოთხმაგებ გამწვანებას - რამდენჯერ შეიძლება, რომ ამომრჩეველი დებილად ჩავთვალოთ", - ამბობს ფერაძე.

ელისაშვილმა ამ საკითხზე ვრცელი საუბარი არ ისურვა, თუმცა აღნიშნა, რომ ნატა ფერაძე მისი გუნდის წევრი არასდროს ყოფილა, თუმცა აქტიური მხარდამჭერი იყო.

"საკრებულოს ინციდენტის დროს ჩემთვის ძალიან მიუღებელი რაღაცები თქვა ნატამ. ლექსიკა იყო ძალიან შეურაცხმყოფელი [ჩემთან მიმართებაში]", - ამბობს მერობის კანდიდატი.