სომხეთის პრემიერმინისტრი ნიკოლ ფაშინიანი სამუშაო ვიზიტით ამერიკის შეერთებულ შტატებში გაემგზავრა. ამის შესახებ ინფრომაცის პრემიერის პრესმდივანზე დაყრდნობით News.am ავრცელებს.

ხუთშაბათს ფაშინიანი ვაშინგტონში "მშვიდობის საბჭოს" (Board of Peace) საინაუგურაციო შეხვედრას დაესწრება.

შეგახსენებთ, "მშვიდობის საბჭოს" შექმნა აშშ-ის პრეზიდენტის, დონალდ ტრამპის მიერ ღაზას სექტორში კონფლიქტის დასასრულებლად შეთავაზებული გეგმის ნაწილი იყო. მისი დაფუძნების შესახებ განცხადება იანვარში გაკეთდა.

"მშვიდობის საბჭოზე" მსოფლიოს 60-მდე ლიდერია მიწვეული, რომელთაგან ზოგიერთი — მათ შორის სომხეთი — დამფუძნებელი წევრია. საბჭოს პირველი თავმჯდომარე თავად დონალდ ტრამპი გახდა.

"მშვიდობის საბჭოს" გახსნის ცერემონია 22 იანვარს, შვეიცარიაში, დავოსის მსოფლიო ეკონომიკური ფორუმის ფარგლებში გაიმართა.