"რუსეთსა და საქართველოს შორის დიპლომატიური ურთიერთობების არარსებობის მიუხედავად, ორმხრივი ეკონომიკური, კულტურული და საგანმანათლებლო კავშირები აქტიურად ვითარდება" — ამის შესახებ Sputnik-ისთვის მიცემულ ინტერვიუში საქართველოში რუსეთის ინტერესების სექციის ხელმძღვანელმა დმიტრი ოლისოვმა განაცხადა. ინტერვიუს რუსეთის ფედერაციის საგარეო საქმეთა სამინისტრო ავრცელებს.

მისი თქმით, რუსეთისა და საქართველოს სავაჭრო ბრუნვა 2025 წელს 6%-ით გაიზარდა და 2.7 მილიარდ დოლარს მიაღწია, ხოლო ქართული ექსპორტი რუსეთში წლიურად 10%-ით გაიზარდა, რომლის 93% სოფლის მეურნეობის პროდუქტებზე მოდის. ოლისოვმა აღნიშნა, რომ რუსეთი ქართული პროდუქციისთვის უმნიშვნელოვანესი ბაზარია: რუსეთზე მოდის ქართული ღვინის ექსპორტის 64%, სხვა ალკოჰოლური სასმელების 56%, მინერალური წყლის 41%, ლიმონათის 31% და ხილის 85%", — განმარტა მან.

მისივე თქმით, საქართველომ რუსეთიდან ძირითადად ენერგორესურსები — ნავთობპროდუქტები და გაზი და საკვები პროდუქტები, მათ შორის ხორბალი, შეიძინა, რომელიც ტრადიციული ქართული კერძების, ხინკლისა და ხაჭაპურის, დამზადებისთვის გამოიყენება. ოლისოვმა აღნიშნა, რომ რუსეთისგან ამ პროდუქტების შესყიდვა "ფასი–ხარისხის საუკეთესო თანაფარდობის დასტურია".

ინტერვიუში ასევე აღნიშნულია, რომ 2025 წელს საქართველოში 1.6 მილიონი რუსი ტურისტი ჩავიდა, რაც ქვეყნის ყველა შემომავალი ვიზიტის 23%-ს შეადგენს, ანუ ყოველი მეოთხე ტურისტი რუსეთიდან იყო. ამავე დროს, საქართველოს მოქალაქეთა საზღვარგარეთ გასვლების 17% რუსეთზე მოდიოდა. ოლისოვმა განაცხადა, რომ ამ პროცესს ხელს უწყობს უვიზო რეჟიმი, ისტორიულ-კულტურული სიახლოვე და პირდაპირი ავიამიმოსვლა — დღეს საქართველოს სამი საერთაშორისო აეროპორტი 11 რუსულ ქალაქთან არის დაკავშირებული.

დიპლომატიური ურთიერთობების არარსებობაზე საუბრისას მან განაცხადა, რომ "მთავრობათაშორისი დიალოგის არარსებობა კვლავ სერიოზულ დაბრკოლებად რჩება სავაჭრო-ეკონომიკური ურთიერთობების განვითარებისთვის".

მან მაგალითად მოიყვანა ლარსისა და დარიალის სასაზღვრო გამშვები პუნქტები, სადაც ტვირთის ნაკადის ზრდის გამო მძიმე სატვირთო მანქანები ხშირად 10 დღემდე დგანან, რაც როგორც მომხმარებლებს, ისე ტრანზიტულ გადამზიდავებს აზარალებს.

ოლისოვმა აღნიშნა, რომ საქართველოში რუსული კულტურისადმი ინტერესი კვლავ ძლიერია. მისი თქმით, 2025 წლის ოქტომბერში თბილისის გრიბოედოვის სახელობის რუსულ დრამატულ თეატრში სერგეი ესენინის 130 წლისთავისადმი მიძღვნილი სპექტაკლის პრემიერა გაიმართა, ხოლო დეკემბერში კონსერვატორიაში ჩაიკოვსკის 185 წლის იუბილესადმი მიძღვნილი კონცერტი.

ოლიოსოვის თქმით, მიუხედავად პოლიტიკური სირთულეებისა, ხალხთა შორის ურთიერთობები კვლავ ვითარდება.

"ორმხრივი ვაჭრობის ზრდა ჩვენი ურთიერთობებისათვის ლაკმუსის ქაღალდია — პოლიტიკის მიუხედავად, რუსი და ქართველი ხალხი ერთმანეთთან ურთიერთობას და თანამშრომლობისკენ სწრაფვას აგრძელებენ", — განაცხადა მან.