მეფრინველეობის განვითარების ასოციაციის წევრი კომპანიები "ირაკლი კობახიძის ინიციატივის გათვალისწინებით" კვერცხზე ფასს 5%-ით ამცირებენ.

"აღნიშნული გადაწყვეტილება მიღებულია საქართველოს პრემიერმინისტრის ინიციატივის გათვალისწინებით, რომელიც სასურსათო პროდუქციის ფასების შემცირებას უკავშირდება.
ასოციაციის წევრი კომპანიები სრულ მხარდაჭერას უცხადებენ სახელმწიფო პოლიტიკას, რომელიც ფასების კლებასა და მოსახლეობის სოციალური პირობების გაუმჯობესებას ისახავს მიზნად," — ვკითხულობთ "სავანეთის", "დილას", "კოდას" და "კუმისის" განცხადებაში.

ცნობისთვის, 16 იანვარს ამავე კომპანიებმა განაცხადეს, რომ კვერცხი საშუალოდ 2 თეთრით გააძვირეს.

შეგახსენებთ, 24 დეკემბერს, ქართულმა ოცნებამ სოციალურ ქსელში გაავრცელა ვიდეორგოლი, სადაც ოცნების პრემიერი ირაკლი კობახიძე სასურსათო პროდუქტების ფასების მატებაზე საუბრობს. მისი განცხადებით, "ქართულ და ევროპულ ფასებს შორის სხვაობა საკმაოდ დიდია" და ამის მიზეზი "სადისტრიბუციო კომპანიებისა და მარკეტების მაღალი ფასნამატია, რომელიც საქართველოს საზღვრიდან დახლამდე საშუალოდ 86%-ს შეადგენს". ამავე ვიდეოში მან სუს-ს მოუწოდა, შეისწავლონ სასურსათო პროდუქტების ფასებთან დაკავშირებული საკითხი და დაადგინონ, ხომ არ იკვეთება დანაშაულის ნიშნები. ამას გარდა, ირაკლი კობახიძე პარლამენტს სთხოვს," შექმნას საპარლამენტო კომისია, რომელიც საკითხის შესაფასებლად შესაბამის საპარლამენტო ბერკეტებს გამოიყენებს".