ევროსასამართლომ ადვოკატ მიხეილ რამიშვილის საქმეზე მისი უფლებების დარღვევა დაადგინა. ამის შესახებ იურისტი გიორგი ბურჯანაძე სოციალურ ქსელში წერს. მისი თქმით, სახელმწიფოს ადვოკატისთვის 10 000 ევრომდე თანხის გადახდა დაევალა.

აღნიშნული საქმის თანახმად, რამიშვილმა ერთ-ერთ სასულიერო პირს, 2017 წლის 20 ოქტომბერს ცილისწამების თაობაზე უჩივლა. ადვოკატი ამტკიცებდა, რომ სასულიერო პირის მიერ ტელეკომპანია "იბერიის" ეთერში გაკეთებული განცხადებები ცილისმწამებლური იყო, რადგან არსებითად მცდარ ინფორმაციას ეიცავდა, რამაც ზიანი მიაყენა მის ღირსებასა და პროფესიულ რეპუტაციას.

"ევროსასამართლომ გამოიტანა საინტერესო გადაწყვეტილება ადვოკატ მიხეილ რამიშვილის საქმეზე და მისი უფლებების დარღვევა დაადგინა.

საქმე შეეხებოდა ცილისწამების გამო დავას, სადაც ადვოკატს დააბრალეს უსაფრთხოების სექტორთან თანამშრომლობა. ქართულმა სასამართლომ არ გაიზიარა მიხეილ რამიშვილის არგუმენტები და განაცხადა რომ რაც მასზე თქვა სასულიერო პირმა, არა ფაქტები, არამედ, მხოლოდ შეფასებები იყოო.

ევროპულმა სასამართლომ არ გაიზიარა ქართული სასამართლოს შეფასება და პირადი ცხოვრების უფლების დარღვევა დაადგინა, რის გამოც სახელმწიფო ბიუჯეტიდან 10000 ევრომდე თანხის გადახდა დაევალა საქართველოს", — დაწერა გიორგი ბურჯანაძემ.

სტრასბურგის სასამართლომ მიიჩნია, რომ ეროვნულმა სასამართლოებმა ვერ შეძლეს სამართლიანი ბალანსის დაცვა კონვენციით გათვალისწინებულ დაპირისპირებულ ინტერესებს შორის. შესაბამისად, დაირღვა კონვენციის მე-8 მუხლი.

სახელმწიფომ მიხეილ რამიშვილს 3 თვის ვადაში უნდა გადაუხადოს: 4500 ევრო მორალური ზიანის ასანაზღაურებლად და 5000 ევრო ხარჯების ასანაზღაურებლად.

შეგახსენებთ, ადვოკატი მიხეილ რამიშვილი დეკანოზ გიორგი მამალაძის ინტერესებს იცავდა ე.წ "ციანიდის საქმეში". მიხეილ რამიშვილი მუშაობდა სანდრო გირგვლიანის საქმეზეც.