ოცნების სანქცირებული შს მინისტრის მოადგილე, ალექსანდრე დარახველიძე აცხადებს, რომ არასრულწლოვანთა რეაბილიტაციის ცენტრის ინფრასტრუქტურა საერთოდ არ არის ციხის მსგავსი და ]ჩვეულებრივი საოჯახო ტიპის საცხოვრებელია. მისივე თქმით, "ასეთ პირობებში ზრუნვა უკეთესია ბავშვის შემდგომი ცხოვრებისთვის"

"10-დან 14 წლამდე ასაკის ბავშვმა თუ ჩაიდინა სისხლის სამართლის კოდექსით გათვალისწინებული ქმედება და სათანადო პროცესების გავლის შემდეგ, რაც გულისხმობს იმას, რომ შესწავლილი იქნა ამ ბავშვის აღზრდის პირობები, საოჯახო პირობები, მისი სწავლა-განათლება და ა.შ. ანუ თუკი მულტიდისციპლინური გუნდი ხედავს, რომ მისი რეაბილიტაციისთვის და მხარდაჭერისთვის აუცილებელია შესაბამის გარემოში გადაყვანა, სასამართლო კონტროლის გზით, მოხდება ბავშვის მოთავსება აღნიშნულ სახლში, რაც არის უკიდურესი ღონისძიება და გამოიყენება მხოლოდ იმ შემთხვევაში, როდესაც შეუძლებელია სხვა სარეაბილიტაციო ღონისძიების ფარგლებში მასზე ზრუნვა.

ინფრასტრუქტურა საერთოდ არ არის ციხის მსგავსი და არის ჩვეულებრივი საოჯახო ტიპის საცხოვრებელი — ასეთ პირობებში ზრუნვა არ არის უკეთესი ბავშვის შემდგომი ცხოვრებისთვის? ჩემი აზრით, და სახელმწიფოს პოლიტიკაც ეს არის, რომ ბავშვებზე ზრუნვა არის ის, რაც მოგვცემს შემდგომ იმის თავდაჯერებას, რომ ასეთი ბავშვები დაცულები იქნებიან იმ მავლე ზეგავლენისგან და ფაქტებისგან, რაც წარსულში ჩაიდინეს", — თქვა ალექსანდრე დარახველიძემ (კომენტარს "ტაბულა" ავრცელებს).

ოცნების პარლამენტმა 2025 წლის 17 დეკემებრს მიიღო კანონი, რომელიც კანონთან კონფლიქტში მყოფ არასრულწლოვანთა რეაბილიტაციის ცენტრის შექმნას ითვალისწინებს.

კანონის მიხედვით, 14 წლამდე მოზარდები კანონის დარღვევის შემთხვევაში "სპეციალურ რეაბილიტაციის ცენტრში" მოიხდიან სასჯელს. ამისთვის კი "დასაბუთებული ვარაუდი" უნდა არსებობდეს.

არასრულწლოვანის აღნიშნულ ცენტრში გადამისამართებას პროკურორი განაგებს. არასრულწლოვანი გადაწყვეტილების მიღებიდან 5 სამუშაო დღის ვადაში უნდა გადამისამართდეს აღნიშნულ ცენტრში, სადაც პირზე ინფორმაციის შეგროვება იწყება. "გამოსასწორებელ" ცენტრს უფლება აქვს სახელმწიფოს სხვადასხვა ორგანოდან ან/და სხვა ისეთი პირიდან ან დაწესებულებიდან გამოითხოვოს არასრულწლოვანზე საჭირო ინფორმაცია.