ზამთრის ოლიმპიური თამაშები ერთ-ერთი ყველაზე მასშტაბური სპორტული მოვლენაა მსოფლიოში. ტურნირი ოთხ წელიწადში ერთხელ იმართება და ყინულსა და თოვლზე შესრულებულ სხვადასხვა სპორტულ სახეობას აერთიანებს.

2026 წლის მოახლოებულ ოლიმპიადას მილანი და კორტინა-დ’ამპეცო (პატარა ქალაქი ჩრდ. იტალიაში) უმასპინძლებენ. ეს იქნება ზამთრის პირველი ოლიმპიური თამაშები, რომელსაც 2 ოფიციალური მასპინძელი ქალაქი ეყოლება. ტურნირი 6-22 თებერვალს გაიმართება და მასში 91 ქვეყნის წარმომადგენლები მიიღებენ მონაწილეობას.

მოკლედ ტურნირის შესახებ

ზამთრის პირველი ოლიმპიადა 1924 წელს, საფრანგეთში, მონბლანის მთის ქვეშ გაშენებულ საკურორტო ქალაქ შამონიში ჩატარდა. თავდაპირველად მას ზამთრის სპორტის საერთაშორისო კვირეული ერქვა, თუმცა მოგვიანებით, პირველი ოლიმპიადის სტატუსი მიენიჭა.

ზამთრის ოლიმპიური თამაშები გამორჩეული ესთეტიკისა და ექსტრემალური სანახაობის სინთეზია. ბობსლეისა თუ ტრამპლინიდან ხტომისას განვითარებული 130-150 კმ/სთ სიჩქარე იმდენად დაძაბულ ატმოსფეროს ქმნის, რომ მაყურებელი თვალს ვერ წყვეტს, იმის მიუხედავად, რამდენად არის სპორტის ამ სახეობაში ჩართული.

სპორტსმენების უნიკალური უნარების, მათი მომზადებისა და გამძლეობის გარდა, ცალკე ყურადღების ღირსია სპორტის ტექნოლოგიური მხარე, რომელიც ტურნირიდან ტურნირამდე უმჯობესდება. თხილამურების ზედაპირის დამუშავება, ციგების აეროდინამიკა ხშირად წამის მეასედებს განსაზღვრავს, რაც გამარჯვებისა თუ წარუმატებლობის განმაპირობებელი ხდება. მაგალითისთვის, თხილამურის ძირზე იჭრება მიკროსკოპული ღარები, რომლებიც თოვლთან ხახუნისას წარმოქმნილ წყლის თხელ ფენას ადრენაჟებს, რაც სპორტსმენს მაქსიმალური სიჩქარის განვითარების საშუალებას აძლევს.

სპორტის სახეობები

ზამთრის 2026 წლის ოლიმპიური თამაშების პროგრამაში სპორტის ახალი სახეობა, სათხილამურო ალპინიზმი დაემატება, სადაც სპორტსმენები ჯერ მთაზე ავლენ თხილამურებით, შემდეგ კი დაშვებაში შეეჯიბრებიან ერთმანეთს. სკი-ალპინიზმში მედლები 3 დისციპლინაში გათამაშდება — ქალთა და მამაკაცთა სპრინტში, ასევე შერეულ ესტაფეტაში.

თოვლის სახეობები შემდეგია:

• სამთო თხილამურობა: დიდი სიჩქარით დაშვება მთის ციცაბო ფერდობზე. მთავარი ამოცანაა, მოთხილამურემ ბოლო წერტილამდე უმოკლეს დროში მიაღწიოს;
• ბიატლონი: უნიკალური სახეობა, რომელიც აერთიანებს თხილამურებით რბოლასა და შაშხანიდან სროლას. აცილებული ტყვია დამატებით საჯარიმო წრეებს ნიშნავს;
• თხილამურებით რბოლა: ეს არის გამძლეობის გამოცდა დიდ დისტანციებზე, სადაც მოთხილამურეები დაღმართზე კი არ ეშვებიან, არამედ საკუთარი ძალით გადაადგილდებიან სწორ ან აღმართიან რელიეფზე;
• ფრისტაილი: აკრობატული სპორტის სახეობა, რომელიც მოიცავს ნახტომებს, ჰაერში შესრულებულ ტრიუკებსა და დაშვებას სპეციალურ დაბრკოლებებზე;
• ტრამპლინიდან ხტომა: საგანგებო პლატფორმიდან სწრაფი დაშვება, ნახტომი და ჰაერში ფრენა. ფასდება როგორც დაფარული მანძილი, ისე ფრენის სტილი და დახტომის უშეცდომოდ შესრულება;
• სნოუბორდი: სნოუბორდით დაშვება, რომელიც სისწრაფეზე შეჯიბრსა და აკრობატულ ილეთებს აერთიანებს;
• ჩრდილოური ორჭიდი: ორი განსხვავებული სახეობის — ტრამპლინიდან ხტომისა და თხილამურებით რბოლის კომბინაცია;
• სათხილამურო ალპინიზმი: ამის თაობაზე უკვე მოგახსენეთ — სპორტსმენები ჯერ თხილამურებით ადიან მთის მწვერვალზე, შემდეგ კი დაბლა ეშვებიან.

ყინულის სახეობები

• ფიგურული სრიალი: ხელოვნებისა და სპორტის სინთეზი, დაუღალავი შრომით შექმნილი ესთეტიკა ყინულზე, სადაც ქულები უშეცდომოდ შესრულებულ რთულ ნახტომებსა და ქორეოგრაფიაში იწერება;
• ყინულის ჰოკეი: გუნდური სპორტი, სადაც მოთამაშეები მოწინააღმდეგის კარში შაიბას გატანას ცდილობენ;
• კერლინგი: საქართველოში სპორტის ამ სახეობას პატივს დიდად არ სცემენ. თუმცა ფაქტი ერთია: კერლინგში წარმატება სტრატეგიულ მოქმედებასა და დეტალებზე ფოკუსირებას მოითხოვს. გუნდები ქვებს სამიზნისკენ აცურებენ და შემდეგ მათ სასურველ პოზიციაში განთავსებას, ასევე მეტოქისთვის ხელის შეშლას ცდილობენ;
• ჩქაროსნული ციგურაობა: რბოლა ყინულზე დიდ ოვალურ ტრასაზე, სადაც მთავარი მაქსიმალური სისწრაფის განვითარებაა;
• შორტ-ტრეკი: ჩქაროსნული რბოლა მცირე ზომის მოედანზე, სადაც სპორტსმენები ჯგუფურად ეჯიბრებიან ერთმანეთს.

ციგაობა და სწრაფი დაშვება

• ბობსლეი: სპორტის ამ სახეობაში 2 ან 4 კაცის გუნდურ დაშვებას ვადევნებთ თვალს. მათი მიზანია, დახურული, აეროდინამიკური ციგით მიზანს მაქსიმალურად მცირე დროში მიაღწიონ;
• სკელეტონი: ინდივიდუალური დაშვება პატარა ციგით. სპორტსმენი მუცელზე წევს, თავი კი წინ აქვს.
• ციგაობა: დაშვება ყინულის ტრასაზე, სადაც სპორტსმენი ციგაზე ზურგით წევს.

საქართველო ზამთრის ოლიმპიადაზე

დამოუკიდებელი საქართველოს სახელით ქართველმა სპორტსმენებმა პირველად 1994 წლის ლილეჰამერის ოლიმპიადაზე იასპარეზეს. ჩვენი ქვეყნისთვის ყველაზე წარმატებული სახეობა ფიგურული სრიალია.

ერთად ვუგულშემატკივროთ ქართველ სპორტსმენებს ზამთრის ოლიმპიურ თამაშებზე. საქართველოს ბანკი საქართველოს ოლიმპიური ნაკრების გენერალური სპონსორია.