ირანის სასამართლო ხელისუფლების განცხადებით, მომიტინგე ერფან სოლთანი სიკვდილით არ დასჯილა, ამის შესახებ ინფორმაციას ირანის სახელმწიფო მედიაზე დაყრდნობით The Guardian ავრცელებს.

26 წლის სოლთანი პირველი ირანელი მომიტინგე იყო, რომელსაც მიმდინარე არეულობის დაწყების შემდეგ სიკვდილით დასჯა მიუსაჯეს.

უფლებადამცველი ჯგუფების ცნობით, სოლთანი, რომელიც ტანსაცმლის მაღაზიაში მუშაობდა, გასულ ხუთშაბათს თეირანის ჩრდილო-დასავლეთ ნაწილში საპროტესტო აქციაში მონაწილეობის შემდეგ დააკავეს და მისი სიკვდილით დასჯა ოთხშაბათს იყო დაგეგმილი.

აშშ-ის პრეზიდენტმა დონალდ ტრამპმა თეთრ სახლში განაცხადა, რომ "მეორე მხარეს არსებული ძალიან მნიშვნელოვანი წყაროები" მას არწმუნებდნენ, თითქოს ირანმა მომიტინგეების მკვლელობა უკვე შეაჩერა და დაგეგმილი სიკვდილით დასჯები აღარ განხორციელდება.

ცნობისთვის, ირანში დემონსტრაციები 2025 წლის 28 დეკემბერს დაიწყო. იმ დღეს, თეირანში მაღაზიების მეპატრონეებმა ეკონომიკური მდგომარეობის გაუარესების გამო პროტესტის ნიშნად თავიანთი ბიზნესები დახურეს. მოგვიანებით, საპროტესტო აქციებს სხვა მსხვილი ქალაქების მაცხოვრებლებიც შეუერთდნენ.

მეტი ირანში განვითარებული მოვლენების შესახებ: