4 ოქტომბერს განვითარებულ მოვლენებთან დაკავშირებით დაკავებულ ევა შაშიაშვილს აღკვეთის ღონისძიების სახით შეფარდებული პატიმრობა 5 000-ლარიანი არასაპატიმრო გირაოთი შეეცვალა. ის რუსთავის ქალთა პენიტენციურ დაწესებულებას დღეს დატოვებს. აღნიშნული გადაწყვეტილება თბილისის საქალაქო სასამართლოს მოსამართლემ გიორგი გელაშვილმა მიიღო.

პატიმრობის გირაოთი შეცვლის შუამდგომლობით სასამართლოს პროკურატურამ მას შემდეგ მიმართა, რაც დაცვის მხარემ ბრალდებულის ჯანმრთელობის შესახებ დამატებითი დოკუმენტაცია წარუდგინა.

მანამდე ადვოკატმა, ლაშა ცუცქირიძე სოციალურ ქსელში გაავრცელა ინფორმაცია იმის შესახებ, რომ პროკურატურამ ევა შაშიაშვილის მიმართ აღკვეთის ღონისძიების შეცვლის შესახებ შუამდგომლობა შეიტანა.

"კარგი ამბავი: სასამართლოდან დამიკავშირდნენ და შემატყობინეს, რომ პროკურატურამ ევა შაშიაშვილის მიმართ აღკვეთის ღონისძიების შეცვლის შესახებ შუამდგომლობა შეიტანა.

პროცესი ჩატარდება 15:30-ზე.

სასამართლოს შემადგენლობამ ფორმალურად შეგვატყობინა ინფორმაცია მათ შორის სხვა ბრალდებულების ადვოკატებსაც.

დიდი ალბათობით ევა ახალ წელს თავის შვილს ჩაეხუტება!

ევას ადვოკატი: მარიამ ხაჭაპურიძე", — დაწერა ადვოკატმა ლაშა ცუცქირიძემ სოციალურ ქსელში

ცნობისთვის, ევა შაშიაშვილის პროკურატურა სსსკ-ს 2 მუხლით ჩადენილ დანაშაულებს ედავება: სტრატეგიული ან განსაკუთრებული მნიშვნელობის ობიექტის ხელში ჩაგდებას ან ბლოკირებას (სისხლის სამართლის კოდექსის 222-ე მუხლის მეორე ნაწილი) და ჯგუფური ძალადობის ორგანიზებას, ხელმძღვანელობას ან მასში მონაწილეობას (225-ე მუხლის მეორე ნაწილი).

ევა შაშიაშვილი ონკოპაციენტია. მას 24 წლის შშმ პირი შვილი ჰყავს, რომელსაც საავადმყოფოში ყოფნის ვადა ეწურება და დედის გარდა სხვა მომვლელი არ ჰყავს.