ოცნების პრემიერის, ირაკლი კობახიძის შემდეგ, არასამთავრობო სექტორს ოცნების პარლამენტის იურიდიული კომიტეტის თავმჯდომარე არჩილ გორდულაძე აკრიტიკებს. ის ამბობს, რომ "ოდიოზური არასამთავრობო ორგანიზაციები, რომლებიც სხვადასხვა ქვეყნის თუ სხვადასხვა ძალის დაფინანსებით საზრდოობენ და მათ ინტერესებს ატარებენ, დიახ, არავითარი არასამთავრობო ორგანიზაციები არ არიან".

"2022 წლამდე არ გვქონდა იმის შესაძლებლობა, რომ საზოგადოებისთვის სიმართლე იმ დოზით გვეთქვა, რა დოზითაც ახლა ვსაუბრობთ, მათ შორის, ვიღებთ ისეთ გადაწყვეტილებებს, რომელიც ჩვენი ქვეყნის ინტერესებისთვის და ჩვენს ქვეყანაში უსაფრთხოების უზრუნველსაყოფად უმნიშვნელოვანესი იყო, მაგრამ მოგვიწევდა კომპრომისებზე წასვლა, რაც ახლა გამორიცხულია. არავითარ შემთხვევაში კომპრომისზე არ წავალთ ვისგანაც არ უნდა მოდიოდეს. ჩვენ, სამწუხაროდ, მოგვიწია, მაგალითად, ისეთი გადაწყვეტილების მიღება, როგორიც არის გიორგი გახარიას პრემიერად ყოფნა, მიუხედავად მის მიერ ჩადენილი ქმედებებისა. ჩვენ მოგვიწია, მაგალითად, ქალბატონი ლომჯარია გაგვეხადა სახალხო დამცველი, რომელზეც წინააღმდეგობა, რა თქმა უნდა, იყო გუნდში, მაგრამ ეს იყო კომპრომისული ვარიანტი. ოდიოზური არასამთავრობო ორგანიზაციები, რომლებიც პირდაპირ სხვადასხვა ქვეყნის თუ სხვადასხვა ძალის დაფინანსებით საზრდოობს და შესაბამისად, მათ ინტერესებს ატარებს, დიახ, ისინი არავითარი არასამთავრობო ორგანიზაციები არ არიან. ისინი სამთავრობო ორგანიზაციები არიან, მაგრამ არა ქართული, არამედ სხვა ქვეყნის", — ამბობს არჩილ გორდულაძე "ტვ პირველთან" საუბრისას.

გუშინ, ოცნების პრემიერმა, ირაკლი კობახიძემ "პირველი არხის" ეთერში განაცხადა, რომ ტერმინები "არასამთავრობო ორგანიზაცია" და "სამოქალაქო საზოგადოება" ტყუილია. "სინამდვილეში, არავითარი არასამთავრობო ორგანიზაციები არ არსებობდნენ საქართველოში".