ჯერემი ბარტონი ივლისში ფისოსთან, სახელად შედოუსთან, ერთად ალასკიდან თავის სახლში — ოკლაჰომაში ბრუნდებოდა. გზად ისინი მდინარე ლიარდის პარკში გაჩერდნენ, რა დროსაც, ფისო გაუჩინარდა. დიდხნიანი ძებნის შემდეგ, ბარტონმა შედოუ ვერ იპოვა.

"შფოთვა დავიწყე და შედოუს საჭმლის თასით ხელში დავდიოდი" — თქვა ბარტონმა.

მოგვიანებით, ბარტონს სახლში დაბრუნება მოუწია, რათა ორი შვილისთვის საყვარელი შინაური ცხოველის დაკარგვის ამბავი ეცნობებინა: "ეს მათთვის საკმაოდ სტრესული იყო, რამდენიმე დღე ტიროდნენ".

ფოტო: Christine Sutherland

ხუთი თვის განმავლობაში, სამძებრო სამუშაოების ჩატარების მიუხედავად, ფისო არავის უნახავს. გამოცემა Energetic City-ის ცნობით, ბარტონმა შედოუს ფოტოები სოციალურ ქსელებშიც გაავრცელა, რათა ადგილობრივებს მისი ამოცნობა შესძლებოდათ.

და, ჰოი, საოცრებავ! შედოუ მოულოდნელად პარკში გამოჩნდა. CBC-ის ცნობით, კატა სასწაულებრივად გადაურჩა კლდოვან მთებში მარტო ყოფნის პერიოდს. თუმცა, დიდ ზეიმს ერთი პატარა გამოწვევაც გამოუჩნდა — როგორ უნდა დაებრუნებინათ შედოუ თავის ოჯახთან, რომელიც ოკლაჰომაში, ასობით კილომეტრის მოშორებით ცხოვრობს.

საბედნიეროდ, პარკიდან სამხრეთ-აღმოსავლეთით, დაახლოებით, რვა საათის სავალზე მდებარე ქალაქიდან ორი ადამიანი შედოუს ოჯახთან დაბრუნებაში დაეხმარება. Energetic City-ის ცნობით, კრისტინ საზერლენდი და ბრიუს კოსუგი ბარტონს დაუკავშირდნენ და შეთანხმდნენ, რომ შობას შედოუ სახლში შეხვდება.

ფოტო: Christine Sutherland

"ბარტონი ოკლაჰომადან უინიპეგში მანქანით აპირებდა ჩამოსვლას, მე კი ფისოსთან ერთად უინიპეგში ან ოკლაჰომა-სიტიში ვაპირებდი ჩაფრენას", — განუცხადა საზერლენდმა გამოცემა Reuter-ს. ბარტონმა დასძინა, რომ მისმა შვილებმა საშობაო საჩუქრები ნებაყოფლობით დათმეს, რათა საჩუქრისთვის განკუთვნილი თანხა შედოუს სახლში დაბრუნებას მოხმარებოდა.

აღსანიშნავია, რომ კოსუგი, ერთ-ერთი მოხალისე, კატებზე ალერგიულია, თუმცა შედოუს ისტორიამ ის იმდენად გააბედნიერა, რომ რვასაათიანი მგზავრობისთვის სამედიცინო ნიღაბიც კი გაიკეთა.

ძალიან მალე, საზერლენდი შედოუსთან ერთად უინიპეგში გაფრინდება, სადაც ფისო ბარტონს შეხვდება.

ფოტო: Getty(2)

"როდესაც საქმე ოჯახის დახმარებას ეხება, ნებისმიერ გასაჭირში, ენერგიას არ ვიშურებთ", — განუცხადა საზერლენდმა CBC-ს — "ბარტონის შვილებს შედოუ ძალიან უყვართ... სასიამოვნოა, რომ ისინი შედოუს შობამდე ნახავენ".