კოალიცია ცვლილებისთვის ერთ-ერთი ლიდერის, ნიკა გვარამიას წინააღმდეგ ახალ სისხლის სამართლის საქმეში ვატო შაქარაშვილის და ნანა კაკაბაძის ჩვენებები დევს. ამის შესახებ ადვოკატმა დიმიტრი საძაგლიშვილმა ტვ პირველთან საუბრისას განაცხადა.

მისი განმარტებით, მათი განცხადებების საფუძველზე დაწყებული გამოძიება "ბუნებრივია, იქნება ამ ქვეყნის ინტერესების საწინააღმდეგო".

"ერთადერთი ნიკა გვარამიას წინააღმდეგ ბრალს შეიძლება პროკურატურის ვერსიით შეიძლება ადასტურებდეს მის მიერ გაკეთებული საჯარო განცხადებები, სხვა ფიზიკურად ვერ იარსებებს კიდევ და კიდევ იმ მარტივი მიზეზის გამო, რომ ეს სასაცილო დანაშაული, საბოტაჟს ვგულისხმობ, არ ჩაუდენია. გამოიძება დაწყებულია და მიმდინარეობს ვატო შაქარაშვილის და ნანა კაკაბაძის განცხადებების საფუძველზე და თავად ეს ფაქტი, ჩემი აზრით, მრავლისმეტყველია. მათი განცხადებების საფუძველზე დაწყებული გამოძიება, ბუნებრივია, იქნება ამ ქვეყნის ინტერესების საწინააღმდეგო", — თქვა დიმიტრი საძაგლიშვილმა.

ცნობისთვის, გუშინ, 7 ნოემბერს პროკურატურაში გამართულ ბრიფინგზე გენერალურმა პროკურორმა გიორგი გვარაკიძემ განაცხადა, რომ 8 ოპოზიციონერი პოლიტიკოსის — მიხეილ სააკაშვილის, გიორგი ვაშაძის, ნიკა გვარამიას, ნიკანორ მელიას, ზურაბ გირჩი ჯაფარიძის, ელენე ხოშტარიას, მამუკა ხაზარაძის და ბადრი ჯაფარიძის წინააღმდეგ სისხლისსამართლებრივი დევნა დაიწყო შემდეგი ბრალდებებით:

  • სახელმწიფო საბოტაჟი;

  • უცხო ქვეყნისათვის მტრულ საქმიანობაში დახმარება;

  • საქართველოს კონსტიტუციური წყობილებისა და ეროვნული უშიშროების საფუძვლების წინააღმდეგ მიმართული საქმიანობის დაფინანსება;

  • მოწოდება საქართველოს კონსტიტუციური წყობილების ძალადობით შეცვლისაკენ.

ნიკა გვარამიას ბრალდება საქართველოს სისხლის სამართლის კოდექსის 318-ე მუხლის პირველი ნაწილით წარედგინა, რაც სახელმწიფო საბოტაჟს გულისხმობს.

პროკურატურა, აღკვეთის ღონისძიების სახით მამუკა ხაზარაძის და ბადრი ჯაფარიძის მიმართ გირაოს, ხოლო სხვა ბრალდებულების მიმართ წინასასამართლო სხდომის თარიღის განსაზღვრის მოთხოვნით სასამართლოს კანონით დადგენილ ვადაში მიმართავს.