ევროპის საბჭოს ადგილობრივი და რეგიონული ხელისუფლებების კონგრესის ბიუროს 30 ოქტომბრის შეხვედრის შემდეგ, კონგრესის მომხსენებლებმა — ბერნდ ფიორინგერმა (გერმანია, EPP/CCE) და სტიუარტ დიქსონმა (გაერთიანებული სამეფო, ILDG), რომლებიც საქართველოში ადგილობრივი დემოკრატიის მდგომარეობას აკვირდებიან, განცხადება გაავრცელეს.

"მკაცრად ვგმობთ საქართველოს პარლამენტის წევრთა გადაწყვეტილებას, საკონსტიტუციო სასამართლოს მიმართონ ქვეყანაში მოქმედი სამი ძირითადი ოპოზიციური ძალის აკრძალვის მოთხოვნით.

დემოკრატია ვერ იარსებებს პოლიტიკური პლურალიზმისა და ეფექტური ოპოზიციის გარეშე. შეშფოთებულები ვართ, რადგან ვხედავთ, რომ საქართველოს დემოკრატიის საფუძვლები თანდათან იშლება.

ვწუხვართ, რომ საქართველოს ხელისუფლებამ უგულებელყო როგორც კონგრესის, ისე ევროპის საბჭოს სხვა სტრუქტურების — მათ შორის ადამიანის უფლებათა კომისრისა და საპარლამენტო ასამბლეის — არაერთი მოწოდება, და მოვუწოდებთ მათ, უარი თქვან ამ ნაბიჯებზე.

კონგრესი მზად არის, ნებისმიერ შესაძლო გზით დაეხმაროს საქართველოს, როგორც ევროპის საბჭოს წევრ ქვეყანას, დემოკრატიის, ადამიანის უფლებებისა და კანონის უზენაესობის დაცვის საქმეში ადგილობრივ დონეზე," — ვკითხულობთ განცხადებაში.

27 ოქტომბერს, ოცნების პარლამენტის თავმჯდომარემ, შალვა პაპუაშვილმა ბრიფინგზე განაცხადა, რომ დღეს იწყებენ დაპირების სამართლებრივი ნაწილის შესრულებას პოლიტიკური პარტიების აკრძალვასთან დაკავშირებით და საკონსტიტუციო სარჩელით 3 პოლიტიკური გაერთიანების არაკონსტიტუციურად ცნობას და აკრძალვას ითხოვენ, ესენია: ერთიანობა ნაციონალური მოძრაობა, კოალიცია ცვლილებისთვის — გვარამია, მელია, გირჩი, დროა და ძლიერი საქართველო — ლელო.

ოცნების სარჩელი საკონსტიტუციო სასამართლოში გუშინ 30 ოქტომბერს შევიდა.