სექსუალური შინაარსის ვიდეოების გავრცელების შემდეგ, რომლებშიც სავარაუდოდ ჩანს ეჩმიაძინის ეკლესიის არქიეპისკოპოსი, არშაკ ხაჩატრიანი სომხეთის გამოძიების კომიტეტმა სისხლის სამართლის საქმე აღიძრა.

საქმე აღიძრა სომხეთის სისხლის სამართლის კოდექსის 204-ე მუხლის მე-3 ნაწილის მე-2 პუნქტით — "პირადი ცხოვრების ხელყოფა სპეციალური ტექნიკური საშუალებების გამოყენებით ინფორმაციის მოსაპოვებლად". გამოძიება მას შემდეგ დაიწყო, რაც 25 ოქტომბერს ერევანში დაფუძნებულმა არასამთავრობო ორგანიზაციამ — "ინფორმირებული მოქალაქეების კავშირი" — პროკურატურას მიმართა განცხადებით, რომ Telegram-არხზე გამოქვეყნდა ინტიმური ხასიათის ვიდეო, რომელშიც, გავრცელებული ცნობებით, შესაძლოა ხაჩატრიანი იყოს ასახული. ოთხი დღის შემდეგ, გენერალურმა პროკურატურამ საჩივარი საგამოძიებო კომიტეტს გადასცა, რათა გადაეწყვიტათ, დაიწყოთ თუ არა სრულფასოვანი გამოძიება.

საგამოძიებო კომიტეტმა დაადასტურა, რომ საქმეზე გამოძიებაა დაწყებული და გადაწყვეტილება 24 საათის განმავლობაში მიიღებენ. ამ დროისთვის უცნობია, გამოძიებამ დაკითხა თუ არა თავად ხაჩატრიანი ან დადგინდა თუ არა ჩანაწერის გამვრცელებელი წყარო.

ოპოზიციურმა პოლიტიკოსებმა და უფლებადამცველებმა მომხდარი უხეში პირად ცხოვრებაში ჩარევად და საშიში პრეცედენტად შეაფასეს. მათი თქმით, მსგავსი ქმედებები მხოლოდ ინდივიდის უფლებების დარღვევა კი არა, სახელმწიფოს მხრიდან მზარდი მეთვალყურეობისა და პოლიტიკურად მოტივირებული დისკრედიტაციის ტენდენციების ნიშანია.

მთავრობამ საჯაროდ დაგმო ვიდეოს გავრცელება, თუმცა არ უპასუხა ეჭვებს, რომ უსაფრთხოების სამსახურებს შესაძლოა წინასწარ ჰქონოდათ ჩანაწერების არსებობის შესახებ ინფორმაცია. პრემიერმინისტრის ადმინისტრაციის ხელმძღვანელმა, არაიკ ჰარუთიუნიანმა განაცხადა, რომ მას მასალა არ უნახავს, თუმცა უსაფრთხოების ეროვნული სამსახური (NSS) "მომხდარის მიზეზების დასადგენად შესაბამის ზომებს იღებს". მან ასევე მოუწოდა ხაჩატრიანს, თავად მიმართოს სამართალდამცავ ორგანოებს.

საკანონმდებლო ორგანოში ოპოზიციონერმა დეპუტატმა არწვიკ მინასიანმა იკითხა, ხომ არ გადაიღო აღნიშნული ვიდეო NSS-მა, და მოითხოვა მთავრობაზე პასუხისმგებლობის დაკისრება, ამის დადასტურების შემთხვევაში. მან ასევე მოუწოდა ხელისუფლებას, გამოიძიოს ჭორები, რომელთა მიხედვითაც პრემიერმინისტრ ნიკოლ ფაშინიანის ადმინისტრაციის ზოგიერთ წევრს მომხდარ ფაქტთან კავშირი აქვს. ჰარუთიუნიანმა კატეგორიულად უარყო მთავრობის კავშირი ვიდეოების გავრცელებასთან და განაცხადა, რომ მსგავსი ბრალდებები პოლიტიკურად მოტივირებულია.

ფაშინიანის კრიტიკოსი ხაჩატრიანი ჯერჯერობით მხოლოდ მოკლე განცხადებით შემოიფარგლა, რომელშიც ვიდეოს ავთენტიკურობა უარყო და მას "ცილისწამება" უწოდა. ეჩმიაძინის დედა ეკლესიას ოფიციალური კომენტარი არ გაუკეთებია, თუმცა სასულიერო პირებმა კერძო საუბრებში შემთხვევა "ეკლესიაზე თავდასხმად" შეაფასეს.

მიმდინარე წელს ფაშინიანს ღიად დაპირისპირება ჰქონდა სასულიერო პირებთან. პრემიერმინისტრმა ხაჩატრიანს საჯარო გამოსვლაში "ამორალური და უსირცხვილო" უწოდა და მას "ზნეობრივი დეგენერაციაში" დასდო ბრალი. დაპირისპირება, რომელიც თავდაპირველად ეკლესიის ავტორიტეტისა და სახელმწიფოსა და კათოლიკოს გარეგინ II-ის ურთიერთობების თაობაზე დაიწყო, თანდათან პოლიტიკურ და მორალურ ბრძოლად გადაიქცა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.