"ოცნება" მტრისკენ მიდის, მტერს ეხუტება და მოყვარეს აგინებს", — ამის შესახებ საკვირაო ქადაგებისას ქვემო ბეთლემის მაცხოვრის შობის ტაძრის წინამძღვარმა, არქიმანდრიტმა დოროთე ყურაშვილმა განაცხადა.

მისი თქმით, მისი სიტყვები "არ ყოფილა ეკლესიის საწინააღმდეგო", ის აკრიტიკებს "მთავრობას, რომელიც რუსეთს ვერ ახსენებს".

"ჩემი სიტყვა არ ყოფილა არაფერი ეკლესიის საწინააღმდეგო, არაფერი სწავლების საწინააღმდეგო. მე მხოლოდ ვამბობ ერთ რამეს, რომ ჩვენ რუსეთი მუდმივად გვებრძვის და რუსეთმა დაგვიპყრო. ვაკრიტიკებ მათ მოქმედებას ჩვენ მიმართ და ვაკრიტიკებ მთავრობას, რომელიც საერთოდ რუსეთს ვერ ახსენებს.

გუშინ სოხუმის დაცემის დღე იყო. ერთი სიტყვა არ უთქვამთ, რა მოხდა იქ. რუსს ვერ აქებენ, იმიტომ რომ ხალხის ეშინიათ და ვერ აგინებენ, იმიტომ რომ რუსების ეშინიათ, იმიტომ რომ მათია. აი ამას რო ვამბობ, ეს ვისაც არ მოსწონს, ერში თუ ბერში, ის ავტომატურად რუსის არის. ის ავტომატურად მტრის მხარესაა და თუ ვინმე მიწუნებს, მიწუნებს იმის გამო, რომ ვამბობ, რომ მტერია. "ოცნება" მტრისკენ მიდის, მტერს ეხუტება და მოყვარეს აგინებს", — თქვა საკვირაო ქადაგებისას არქიმანდრიტმა დოროთე ყურაშვილმა.

ცნობისათვის გუშინ, 27 სექტემბერს "ტვ პირველმა" გამოაქვეყნა არქიმანდრიტ დოროთე ყურაშვილისა და 3 სასულიერო პირის — მამა მიქაელ ბოტკოველის, ანდრია ჯაღმაიძის და იოანე გოგორელიშვილის საპატრიარქოში ჩაწერილი აუდიოჩანაწერი. სასულიერო პირები არქიმანდრიტს მისი საჯარო განცხადებების გამო განმარტებებს სთხოვდნენ. ჩანაწერის ავთენტიკურობა სამივე სასულიერო პირმა დაადასტურა.

სიუჟეტის ეთერში გასვლის შემდეგ, საპატრიარქოს საზოგადოებასთან ურთიერთობის სამსახურის ხელმძღვანელმა, დეკანოზი ანდრია ჯაღმაიძემ სოციალურ ქსელში დაწერა, რომ ჩანაწერის გაკეთება არქიმანდრიტმა დოროთე ყურაშვილმა ითხოვა და საუბარი თავისსავე ტელეფონზე ჩაიწერა.

"პატარა კომენტარი:

საპატრიარქოში შეხვედრის ჩაწერა მოსვლისთანავე ითხოვა მამა დოროთემ, არ გვითქვამს უარი და არც გვიკითხავს რაში დასჭირდებოდა ეს.

და "ტვ პირველი" არ ასახელებს, ვინ მიაწოდათ ჩანაწერი", — წერს ანდრია ჯაღმაიძე.

რაც შეეხება უშუალოდ აუდიო ჩანაწერს, "ტვ პირველის" ცნობით, ჩანაწერიდან დგინდება, რომ დოროთე ყურაშვილი საპატრიარქოში ახსნა-განმარტებისთვის დაიბარეს და საპროტესტო აქციების და სინდისის პატიმრების დიდ გულშემატკივარს საკუთარ განცხადებებზე, ტელე ინტერვიუებსა და ქადაგეგბებზე მოსთხოვეს პასუხი.

ჩანაწერის მიხედვით, ქვემო ბეთლემის მაცხოვრის შობის ტაძრის წინამძღვარი, არქიმანდრიტი დოროთე ყურაშვილი საპატრიარქოს სხვა წარმომადგენლების "მორალურად დაკნინებაში" დაადანაშაულა მამა ანდრია ჯაღმაიძემ.

"ვერ ბედავენ, კაცობა უნდა გეყოს ახლა, რომ გამოხვიდე და თქვა". რატომ აყენებ ასე მეტრს, საზომს, სხვებს რატო აკნინებ?!

...სასულიერო პირების დიდი ნაწილი შეურაცხყოფილია, იმის გამო რომ თქვენ მეტრი დააყენეთ, რომ ვინც ახლა სიმართლეს არ ლაპარაკობს, ე.ი. გამბედაობა და კაცობა არ ჰყოფნის", — საყვედურობს მამა ანდრია ჯაღმაიძე არქიმანდრიტს.

"მოვინიშნე შენი ნათქვამები და პასუხები მაინტერესებს. "სამწუხაროდ, სულ რამდენიმე მღვდელი აღმოვჩნდით, რომლის მეშვეობითაც ქრისტე საზოგადოებას ესაუბვრება — სიმართლეს! მე რასაც ვამბობ, ამით ქრისტე ეუბნება ხალხს". ჩვენ რას ვაკეთებთ დანარჩენები, შენი ძმები არ ვართ ჩვენ?", — ამბობს მამა მიქაილ ბოტკოველი ჩანაწერში.