ყოფილი თავდაცვის მინისტრის, ჯუანშერ ბურჭულაძის ადვოკატის, მარიამ შათირიშვილის განცხადებით ბრალდებულისთვის დაწესებულ აღმკვეთ ღონისძიებას — წინასწარ პატიმრობას სააპელაციო სასამართლოში გაასაჩივრებენ.

შათირიშვილის განცხადებით, სასამართლომ გადაწყვეტილება სუსტი შუამდგომლობის საფუძველზე მიიღო და "არის შანსი შედეგის მიღწევის".

"ჩვენ პოლიტიკურ შეფასებას ვერ გავაკეთებთ, უბრალოდ, მე შემიძლია ვთქვა, რომ საქმე, ბრალდება ბატონი ჯუანშერ ბურჭულაძის მიმართ არის დაუსაბუთებელი
ჩვენი პირველი გეგმა არის აღკვეთის ღონისძიების შესახებ განჩინების გასაჩივრება სააპელაციო წესით. ბუნებრივია, ჩვენ ილუზიით არ ვიკვებებით, თუმცა მიგვაჩნია, რომ იმ ფორმით, რა ფორმითაც მოხდა, სუსტი შუამდგომლის საფუძველზე აღკვეთის ღონისძიების შეფარდება — სამართლებრივად ჩვენ გვაქვს შანსი, რომ მივაღწიოთ რაიმე შედეგს. ჩვენ ორშაბათს გავასაჩივრებთ დღის ბოლომდე," — განაცხადა ბურჭულაძის ადვოკატმა "ტვ პირველთან".

სასამართლომ დააკმაყოფილა პროკურატურის მოთხოვნა და ჯუანშერ ბურჭულაძეს წინასწარი პატიმრობა შეუფარდა — გადაწყვეტილება მოსამართლე ეკა ბარბაქაძემ მიიღო. პროკურატურის განმარტებით, აღმკვეთი ღონისძიების სახით პატიმრობას ითხოვენ, რადგან არსებობს მიმალვის ან მოწმეებზე ზემოქმედების შანსი.

ჯუანშერ ბურჭულაძე სამსახურებრივი უფლებამოსილების გადამეტებისა და ფულის გათეთრების ბრალდებით დააკავეს. თავდაცვის ყოფილ მინისტრს 9-დან 12 წლამდე პატიმრობა ემუქრება.