პარტია ფედერალისტების ერთ-ერთი ლიდერი გიგა ბოკერია ამავე პარტიის ერთ-ერთი ლიდერის, თამარ ჩერგოლეიშვილის შესახებ ერთიანი ნაციონალური მოძრაობის განცხადებასთან დაკავშირებით სოციალურ ქსელში წერს. მისი თქმით, ჩერგოლეიშვილის საქციელი გაუმართლებელია და როგორც ფედერალისტების ერთ-ერთ ლიდერს მასაც ეკუთვნის ბოდიშის მოხდა. მისივე თქმით, ნაციონალურ მოძრაობას უჭირს ნებისმიერი თანამშრომლობა, სადაც მათ პარტიას და მიხეილ სააკაშვილს ცენტრალური ადგილი არ უკავია.

"ორ საკითხს მინდა გამოვეხმაურო. პირველი ეხება სოციალურ ქსელში თამარ ჩერგოლეიშვილის კომენტარს, მის წინააღმდეგ უხამსი ცილისწამების საპასუხოდ.

ასეთი პასუხი ცალსახად დაუშვებელია.

სოციალურ ქსელში ხშირად ვხვდებით ბინძურ ბრალდებებს, მაგრამ ეს არანაირად ამართლებს თამარის რეაქციას. მან მალევე მოუბოდიშა საზოგადოებას.

თამარ ჩერგოლეიშვილი ჩვენი პოლიტიკური გუნდის გამორჩეული ლიდერია და ამიტომ მეც მეკუთვნის ამ ინციდენტის გამო ბოდიშის მოხდა. ამ დაუშვებელი რეაქციის ანატომიის ახსნა არ ემსახურება მის გამართლებას — მხოლოდ სერიოზული შეცდომის მიზეზის განმარტებაა.
მეორე საკითხია ამ ინციდენტის გამოყენება ნაციონალური მოძრაობის და მასთან აფილირებული საჯარო ფიგურების მიერ. აშკარაა, რომ მათ ეს ინციდენტი ხელსაყრელ საბაბად ჩათვალეს.
ნაციონალურ მოძრაობას უჭირს ნებისმიერი თანამშრომლობა, სადაც მათ პარტიას და მათ ლიდერს — პოლიტპატიმარ მიხეილ სააკაშვილს ცენტრალური ადგილი არ უკავია და სადაც ღიად აკრიტიკებენ მათი ლიდერის და სხვა ფიგურების უპასუხისმგებლო ნაბიჯებს თუ გამონათქვამებს. ამას თან ერთვის ამ პარტიის შიგნით არსებული ღრმა კრიზისი.

ფედერალისტები კი ყოველთვის აუცილებლად მივიჩნევდით და მივიჩნევთ, კრიტიკულად გამოვეხმაუროთ იმას, რაც ჩვენი აზრით, საპროტესტო მოძრაობას აზიანებს.

ამასთან ერთად, ჩვენ საჭიროდ მივიჩნევთ თანამშრომლობას განსხვავებული შეხედულებების, ზოგჯერ კი განსხვავებული ფასეულობების მქონე პოლიტიკურ ძალებს შორისაც იმ საკითხებზე, რაც გვაერთიანებს. ასეთი ამოცანა იყო და არის ივანიშვილის რეჟიმის მიერ დადგმული, ე.წ 4 ოქტომბრის თვითმმართველობის არჩევნების ფარსის დელეგიტიმაცია.

ამჟამად, ჩვენი პრიორიტეტი 13 სექტემბრის საპროტესტო აქცია და ამის შემდეგ საპროტესტო მოძრაობის გაფართოებაა, რაც ივანიშვილის რეჟიმის ძალაუფლებიდან ჩამოცილებით უნდა დასრულდეს"— დაწერა ბოკერიამ.

ცნობისთვის, პარტია ფედერალისტების ერთ-ერთმა ლიდერმა, თამარ ჩერგოლეიშვილმა News.On.ge-ს "ქარდზე" ნეგატიური კომენტარების ავტორებს შეურაცხყოფა მათივე ფეისბუქ-პროფილებიდან აღებული მცირეწლოვანი ბავშვების ფოტოების გამოყენებით მიაყენა.

თამარ ჩერგოლეიშვილმა მოგვიანებით ბოდიში მოიხადა და News.On.ge-ს "ქარდზე" კომენტარები წაშალა.

საპასუხოდ, 28 აგვისტოს ენმ-ის თავმჯდომარემ, თინა ბოკუჩავამ ჩერგოლეიშვილის საქციელი დაგმო და 8 პარტიის ფორმატში მყოფ ოპოზიციურ პარტიებს მოუწოდა, თამარ ჩერგოლეიშვილთან ურთიერთობა დაასრულონ.

ამ საკითხს გამოეხმაურა "კოალიცია — ცვლილებისთვის" ერთ-ერთი ლიდერი ელენე ხოშტარიაც. მისი თქმით, ჩერგოლეიშვილი "ძალიან ცუდად მოიქცა", მაგრამ ეს 8 პარტიის ერთობას ვერ დაშლის.

ელენე ხოშტარია: 8-იანი ჩერგოს ხასიათზე არ აწყობილა და არც არავის ხასიათზე. ამორალური ბევრი გიჭამიათ სათითაოდ, ძალიან ბევრი. ქვეყანას დიდი პრობლემები აქვს