"ეს ბიჭები, რომლებიც სამწუხაროდ საბრალდებო სკამზე სხედან, იცავდნენ ჩვენი ქვეყნის ევროპულ მომავალს, სიტყვისა და აზრის გამოხატვის თავისუფლებას და სიმართლეს" — ასე მიმართა სინდისის პატიმრის, ონისე ცხადაძის ადვოკატმა ლაშა ცუცქირიძემ მოსამართლე ნინო გალუსტაშვილს თბილისის საქალაქო სასამართლოში მიმდინარე პროცესზე, რომელიც ორგანიზებულ ჯგუფურ დანაშაულში ბრალდებული 11 პირის საქმეს ეხება.

"ეს ბიჭები, რომლებიც სამწუხაროდ საბრალდებო სკამზე სხედან, იცავდნენ ჩვენი ქვეყნის ევროპულ მომავალს, სიტყვისა და აზრის გამოხატვის თავისუფლებას და სიმართლეს. და თუ თქვენ, თქვენი გადაწყვეტილებით, არ დაიცავთ ჩვენი ქვეყნის ევროპულ მომავალს, სიტყვისა და აზრის გამოხატვის თავისუფლებას და სიმართლეს, თქვენივე გადაწყვეტილება გახდება იარაღი, რომელიც მიმართულია სწორედ ამ ღირებულებებისკენ.

და როდესაც სათათბირო ოთახში გახვალთ გადაწყვეტილების მისაღებად, გულწრფელად გისურვებთ შეუვალობას, დამოუკიდებლობას და გამბედაობას, ვინაიდან ნებისმიერ შემთხვევაში, რა განაჩენიც არ უნდა გამოიტანოთ, ჩვენი ქვეყნის სამართალწარმოების უახლეს ისტორიაში ერთ-ერთი რთული და მძიმე გადაწყვეტილების მიღება მოგიწევთ," — მიმართა ლაშა ცუცქირიძემ გალუსტაშვილს.

თავდაპირველად, ადვოკატმა თავისი სიტყვა ონისეს ცხადაძის ციტირებით დაიწყო.

"ონისემ თქვა სასამართლოში მას შემდეგ, რაც მისმა ოჯახმა დიდი დანაკარგი განიცადა:

"ეს, რაც მოხდა, ჩემი პირადი ტრაგედიაა და ადრე თუ გვიან ეს ჩემი და ჩემი ოჯახის სატარებელი იქნება, მეტი არავის. მე არ ვაპირებ რომ არ გაპატიოთ, ადამიანურად. მე არ მექნება არავის მიმართ ბოღმა, ღვარძლი და მტრობა.

მე უარესსაც ველოდები, ხვალ შეიძლება მე არ ვიყო. ასეთი ბრძოლაა, რა უჭირს მე რომ ხვალ არ ვიყო და ქვეყანა გადარჩეს, ოღონდ ეგ მოხდეს და მეტი არაფერი მაინტერესებს.“

აი ეს ადამიანია დღეს საბრალდებო სკამზე და ამ ადამიანს ემუქრება 4-6 წლამდე თავისუფლების აღკვეთა, რომლისთვისაც სამშობლო და საკუთარი ქვეყანა არის უპირატესი, ვიდრე თავისი თავი," — განაცხადა ადვოკატმა.

სხდომაზე ადვოკატები დასკვნითი სიტყვების თქმას დაასრულებენ და სავარაუდოდ, ბრალდებულების ნაწილი საბოლოო სიტყვას დღესვე იტყვის.