დიდი ბრიტანეთის სარეკლამო სტანდარტების სააგენტომ ზარას ორი რეკლამა აკრძალა, მიზეზად კი დაასახელა, რომ მათზე გამოსახული მოდელები "ზედმეტად გამხდრები" არიან.

სააგენტომ განაცხადა, რომ ერთ რეკლამაში ჩრდილები და გადაწეული თმა მოდელს ზედმეტად გამხდარსა და გამოფიტულს აჩენდა, ხოლო მეორე რეკლამაში მოდელის პოზა და დეკოლტე მის "გამოწეულ" ლავიწის ძვლებზე ამახვილებდა ყურადღებას.

საზედამხედველო ორგანომ ზარას მოუწოდა, რომ მსგავსი "უპასუხისმგებლო" რეკლამებისგან თავი შეიკავოს.

ზარამ აკრძალული რეკლამები აპლიკაციიდან და ვებსაიტიდან წაშალა და განაცხადა, რომ ორივე მოდელს ჰქონდა სამედიცინო ცნობა, რომელიც ადასტურებდა, რომ ფოტოების გადაღებისას ჯანმრთელები იყვნენ.

ამ რეკლამებიდან ერთ-ერთი მოკლე კაბას ეძღვნებოდა, სარეკლამო სტანდარტების სააგენტომ კი ჩათვალა, რომ მოდელის ფეხების წვრილად გამოსაჩენად რეკლამაში ჩრდილები იყო გამოყენებული. ამასთან ერთად, მკლავებისა და იდაყვების განლაგება მას არაპროპორციულს აჩენდა.

ფოტო: Zara

მეორე კი პერანგის რეკლამა იყო, რომელშიც, სააგენტოს თქმით, ყურადღების ცენტრი მოდელის გამოკვეთილი ლავიწის ძვლები იყო.

ფოტო: Zara

ორგანომ ამის გარდა კიდევ ზარას 2 რეკლამა გამოიძია, თუმცა მათში დარღვევები ვერ იპოვა.

ზარამ განაცხადა, რომ უმნიშვნელო სინათლისა და ფერების რედაქტირების გარდა, არცერთი სურათი არ იყო ხელოვნურად შეცვლილი. ასევე დაამატა, რომ კომპანია მიჰყვება "ჯანსაღი მომავლის შექმნის" ანგარიშს, რომელიც 2007 წელს დიდ ბრიტანეთში გამოიცა და აღნიშნა, რომ მან შეასრულა ანგარიშის მესამე რეკომენდაცია, რომლის მიხედვითაც მოდელებმა უნდა წარმოადგინონ კვებითი დარღვევების ამოცნობის ექსპერტი ექიმებისგან გაცემული სამედიცინო ცნობა, რომელიც ადასტურებს მათ ჯანმრთელობას.

ზარა პირველი კომპანია არაა, რომლის რეკლამებიც ამ პრობლემის გამო აიკრძალა — სარეკლამო სტანდარტების სააგენტომ წელს Marks & Spencer-სა და Next-ის რეკლამებიც ზუსტად იმავე მიზეზებით აკრძალა.