სულ ცოტა ხნის წინ ქართველი რეპერის, ეკუნა ყანჩაველის, ახალი კლიპი Gotta Run გამოვიდა. კლიპი ბათუმშია გადაღებული, სიმღერის ავტორი კი თავად ეკუნაა.

მომღერლის თქმით, სიმღერაზე ძალიან ბევრი იმუშავა.

"თითოეული ფრაზა ჩემი დაწერილია, ვხვდები, რომ როცა რაღაც გულით გინდა, მთელი სამყარო გეხმარება ამ სურვილის ასრულებაში. ადრე სულ მესმოდა ფრაზები, 'რა მუსიკა, რა რეპი, რამე რეალურზე იოცნებე, საქართველოში აზრი არ აქვს, ქავერები უფრო მომგებიანია', მაგრამ არ დაუჯეროთ არცერთ ბოროტ ხმას, ბოლომდე მიაწექით იმას, რისიც გჯერათ" - ამბობს ეკუნა.

კლიპი CHCHX Prodctions-მა გადაიღო, მისი კრეატიული ნაწილი კი IMEDIA HUB-ს ეკუთვნის, რომელიც დღეს ეკუნას პროდიუსინგითაა დაკავებული. კლიპი კომპანია Inntech-მა დააფინანსა.

"რეალურად დღეს ეკუნა თავისი პოპულარულობით ლიდერია ვიდეო ბლოგერებს შორის და თავის სეგმენტში ყველაზე ცნობილი სახეა, თუმცა გარკვეული ფინანსური და ლოჯისტიკური პრობლემების გამო აქამდე ვერ ხერხდებოდა სრულად პროფესიონალური კონტენტის შექმნა. ამჯერად, ეკუნას ჰყავს უკვე გვერდით კრეატიული სააგენტო და პროდაქშენი, რომელიც ამ ხარისხს უზრუნველყოფენ" - ამბობს On.ge-სთან საუბრისას ეკუნას პროდიუსერი ილო ღლონტი.