2025 წლის 19 ივლისს, მცხეთა-მთიანეთის პოლიციამ ცეცხლსასროლი იარაღის, საბრძოლო მასალისა და ფეთქებადი ნივთიერებების მართლსაწინააღმდეგო შეძენა-შენახვის ბრალდებით ერთი პირი — 1963 წელს დაბადებული მ.ნ. — დააკავა.

შინაგან საქმეთა სამინისტროს ინფორმაციით, საგურამოს პოლიციისა და დუშეთის რაიონული სამმართველოს თანამშრომლებმა ოპერატიული ინფორმაციის საფუძველზე ჩაატარეს ჩხრეკა, რა დროსაც ამოიღეს: 2 581 საბრძოლო ვაზნა, 12 შეკვრა ასაფეთქებელი ნივთიერება „ტროტილი“, 15 ამფეთქი ფალია, 15 მჭიდი, 2 ხელყუმბარა, ტყვიამფრქვევი.

უწყების ცნობით, ასევე ამოღებულია ნარკოტიკული ნივთიერებები: გამომშრალი მარიხუანა, ფსიქოტროპული საშუალება და 6 ძირი კანაფის მცენარე.

საქმეზე გამოძიება მიმდინარეობს საქართველოს სისხლის სამართლის კოდექსის 236-ე მუხლის მე-3 ნაწილით (ცეცხლსასროლი იარაღისა და საბრძოლო მასალის უკანონო შეძენა-შენახვა), 265-ე მუხლით (ნარკოტიკული საშუალების უკანონო დამზადება-შენახვა) და 273-ე პრიმა მუხლის პირველი ნაწილით (კანაფის უკანონო მოყვანა).

დანაშაული 6 წლამდე ვადით თავისუფლების აღკვეთას ითვალისწინებს.