ისრაელსა და სირიას შორის ცეცხლის შეწყვეტის შეთანხმება, სირიის სამხრეთ-დასავლეთ ნაწილში მდებარე სვეიდას პროვინციაში მძიმედ გამწვავებული დაპირისპირების შემდეგ შედგა. ინფორმაციას ამის შესახებ Reuters ავრცელებს.

კონფლიქტის დროს, დრუზ ხალხსა და ბედუინ მებრძოლებს შორის შეტაკებებმა 300-ზე მეტი ადამიანი იმსხვერპლა.

შეთანხმება ისრაელის მიერ დამასკოსა და სირიის სამხრეთის ტერიტორიებზე განხორციელებული ავიაიერიშების შემდეგ გაფორმდა — ისრაელის თქმით, დარტყმების მიზანი დრუზი უმცირესობის დაცვა იყო. დრუზები ეთნიკურ-რელიგიური ჯგუფია, რომელსაც წარმომადგენლები ჰყავს, როგორც სირიაში, ასევე ლიბანსა და ისრაელშიც.

ცეცხლის შეწყვეტის შეთანხმება თურქეთში აშშ-ის ელჩმა ტომ ბარაქმა დაადასტურა, რომელმაც სირიის სხვადასხვა თემს შეიარაღებული დაპირისპირების შეწყვეტისკენ მოუწოდა:

"მოვუწოდებთ დრუზებს, ბედუინებსა და სუნიტებს, დაუშვან იარაღი და სხვა უმცირესობებთან ერთად ახალი და ერთიანი სირიული იდენტობის ჩამოყალიბებაზე იმუშაონ," — განაცხადა ტომ ბარაქმა.

შეთანხმება აშშ-ის, თურქეთის, იორდანიისა და რეგიონის სხვა აქტორების შუამდგომლობით გაფორმდა.

თავდაპირველად ისრაელი სირიის სამხრეთში სირიის ძალების შეყვანას ეწინააღმდეგებოდა, თუმცა ახლა ის 48-საათიან პერიოდს, რომლის განმავლობაში სირიის შიდა უსაფრთხოების ძალებს სვეიდაში წესრიგის აღდგენის უფლება ექნებათ, დასთანხმდა.

სირიის პრეზიდენტის ადმინისტრაციამ ძალების სვეიდაში შეყვანა დაადასტურა:

"ეს არის სპეციალური დანიშნულების ძალა სამხრეთში, რომლის მიზანი დაპირისპირების დასრულებაა, პოლიტიკური და უსაფრთხოების ზომებთან კოორდინაციით, რათა სტაბილურობა აღდგეს და არ დაუშვან ძალადობის ხელახლა გაჩენა", — განაცხადა მან.

მიუხედავად ცეცხლის შეწყვეტის შეთანხმებისა, სვეიდაში ათასობით ბედუინი მებრძოლი კვლავ შედის. ადგილობრივები მძიმე ჰუმანიტარული პირობების შესახებ იუწყებიან. ისინი საკვების, წყლის, საწვავის, ელექტროენერგიისა და ინტერნეტის მწვავე დეფიციტზე საუბრობენ.

გაეროს ლტოლვილთა სააგენტო აცხადებს, რომ 2,000-ზე მეტი ოჯახია იძულებით გადაადგილებული და მოუწოდებს მხარეებს, ჰუმანიტარულ დახმარებაზე წვდომა უზრუნველყონ.

აშშ-მ კვლავ დაადასტურა მხარდაჭერა ცეცხლის შეწყვეტის მიმართ, თუმცა აღნიშნა, რომ ისრაელის ბოლო საჰაერო დარტყმებს მხარს არ უჭერდა. სირიის გარდამავალი პერიოდის ლიდერმა, აჰმედ ალ-შარამ, რომელიც დასავლეთთან კავშირებს ამყარებს, ისრაელი სირიის დესტაბილიზაციის მცდელობაში დაადანაშაულა და დრუზი უმცირესობის დაცვაზე განაცხადა:

"დავიცავთ ჩვენს დრუზ მოქალაქეებს", — თქვა შარამ.

კონფლიქტის შესახებ ვრცლად იხილეთ:

ისრაელმა დამასკოს ცენტრზე საჰაერო იერიში მიიტანა — კონფლიქტის მიზეზები და საერთაშორისო გამოხმაურება