ტელეკომპანია "იმედის" მფლობელი ირაკლი რუხაძე პროსამთავრობო და ანტიდასავლური პროპაგანდის გავრცელების გამო კრიტიკის ქარცეცხლში მოყვა. მისი საქმიანობის შესახებ ნიდერლანდურმა საგამოძიებო ჟურნალისტიკის პლატფორმა FTM-მა ვრცელი სტატია დაწერა, სადაც ვკითხულობთ, რომ მაშინ, როცა რუხაძე ბიზნესს ნიდერლანდებშიც ფლობს პროსამთავრობო და ანტიდასავლური პროპაგანდას ავრცელებს. ჰოლანდიური ოფიციალური ორგანოების თქმით, მისთვის სანქციების დაწესება მხოლოდ ევროკავშირის ფართო კონსენსუსის შემთხვევაშია შესაძლებელი.

"ქვეყანაში დემოკრატიის ძირის გამოთხრის პარალელურად — რაც პროსამთავრობო პროპაგანდისტული არხის, ტელეკომპანია "იმედის" მეშვეობით ხორციელდება — ქართველი ბიზნესმენი, ირაკლი რუხაძე საკუთარ ბიზნესინტერესებს ნიდერლანდებში მიმართავს. თუმცა, ამსტერდამი, როგორც ჩანს, არ ჩქარობს ზომების მიღებას საქართველოს ანტიევროპული მედიამაგნატის წინააღმდეგ ევროკავშირის ფართო სანქციების გარეშე", — წერია სტატიაში.

Follow the Money-ისა და Transparency International-ის გამოძიებამ გამოავლინა, რომ რუხაძის ოთხი მნიშვნელოვანი კომპანია, მათ შორის ტელეკომპანია "იმედის" მფლობელი ორგანიზაცია, რეგისტრირებულია ნიდერლანდებში. მათგან ერთ-ერთს ნაწილობრივ ივანიშვილთან დაკავშირებული საინვესტიციო ფონდი ფლობს. კომპანიების ადმინისტრირება ნიუ ჯერსიში დაფუძნებული JTC Group-ში ხდება.

2021 წლიდან ამ კომპანიებმა დირექტორების მიერ ხელმოწერილი ფინანსური ანგარიშები არ წარადგინეს, რაც ჰოლანდიის სავაჭრო პალატამ "ეკონომიკურ დანაშაულად" შეაფასა . მიუხედავად ამისა, ჰოლანდიის მთავრობა აცხადებს, რომ მოქმედი კანონმდებლობის ფარგლებში დამოუკიდებლად ვერ იმოქმედებს.

საქართველოს სამოქალაქო საზოგადოების წარმომადგენლები რეაგირების ითხოვენ. Transparency International Georgia-ს ხელმძღვანელმა, ეკა გიგაურმა რუხაძის წინააღმდეგ ევროკავშირის ან თუნდაც მხოლოდ ნიდერლანდების ტერიტორიაზე შესვლის აკრძალვა მოითხოვა:

"ეს ადამიანები პრორუსულ ინტერესებს ემსახურებიან და ძირს უთხრიან ევროპულ ღირებულებებს", — განაცხადა მან.

ცნობისთვის, ლიეტუვამ 2029 წლამდე ქვეყანაში შესვლა უკვე აუკრძალა. 2023 წელს აშშ-მა ბიძინა ივანიშვილს დემოკრატიისა და ევროატლანტიკური მისწრაფებების დაბრკოლების გამო (აშშ ფინანსთა სამინისტრო) სანქციები დაუწესა. მიუხედავად ამისა, ჰოლანდია აცხადებს, რომ დამოუკიდებლად მოქმედება ვერ მოხერხდება ევროკავშირის კონსენსუსის გარეშე.