აშშ-სა და ჩინეთს შორის დაძაბულობის ფონზე, მხარეებმა შეთანხმებას მიაღწიეს, რის შედეგადაც ჩინეთი ამერიკას იშვიათი წიაღისეულის ექსპორტს განუახლებს.

"ჩინეთი მზად არის იმ პროდუქციის ექსპორტი დაუშვას, რომელიც არსებული კანონების მიხედვით, ყველა მოთხოვნას აკმაყოფილებს, თავის მხრივ კი შეერთებული შტატები შეთანხმების ფარგლებში ჩინეთის წინააღმდეგ დაწესებულ გარკვეულ შეზღუდვებს მოხსნის",— აცხადებს ჩინეთის ვაჭრობის სამინისტრო.

აღსანიშნავია, რომ ამ ტიპის წიაღისეულს — იშვიათ მიწაელემენტებს მნიშვნელოვანი ადგილი უკავია ისეთი ტექნოლოგიების წარმოებაში, როგორიცაა მობილური ტელეფონები, ელექტრომობილები და სამხედრო დანიშნულების აღჭურვილობა.

ცნობილია, რომ მსოფლიოში იშვიათი მიწაელემენტების გადამუშავების 90%-ზე მეტი ჩინეთის ხელშია, რაც ბოლო პერიოდში ორ ქვეყანას შორის სავაჭრო დავის ერთ-ერთ მთავარ მიზეზად იქცა.

2025 წლის აპრილიდან, მას შემდეგ, რაც აშშ-მ ჩინურ პროდუქციაზე ტარიფები დააწესა, პეკინმა ამ ტიპის წიაღისეულის ექსპორტზე შეზღუდვები დააწესა. საპასუხოდ, ვაშინგტონმა ჩინეთისთვის მაღალი ტექნოლოგიების — ჩიპების, პროგრამული უზრუნველყოფის, ეთანისა და რეაქტიული ძრავების მიწოდება აკრძალა, ასევე დააანონსა ჩინელი სტუდენტებისთვის ამერიკულ უნივერსიტეტებში სწავლაზე ვიზების შეზღუდვა.

შეთანხმების პირველი მცდელობა ჟენევაში ჩავარდა, თუმცა ივნისში ლონდონში გამართულ მოლაპარაკებებზე მხარეებმა შეთანხმებას მიაღწიეს. დოკუმენტი ითვალისწინებს იშვიათი მიწაელემენტების მიწოდებას ჩინეთის მხრიდან, ხოლო აშშ, თავის მხრივ, გარკვეულ სავაჭრო შეზღუდვებს მოხსნის და ჩინელ სტუდენტებს კვლავ მისცემს აშშ-ში განათლების გაგრძელების საშუალებას.

ჩინეთის ვაჭრობის სამინისტრომ უკვე დაადასტურა, რომ იშვიათი მიწაელემენტების ექსპორტზე ნებართვების გაცემას გაააქტიურებს, თუმცა თითოეული გადაზიდვისთვის საჭირო იქნება სპეციალური დოკუმენტაციის წარდგენა და საბოლოო დანიშნულების დასაბუთება.

ამავდროულად, ამერიკის კომერციის სამინისტრომ ეთანის ჩინეთში გადაზიდვა უკვე დაუშვა, თუმცა მისი ჩამოტვირთვა ჩინეთის პორტებში ჯერ კიდევ სპეციალურ ნებართვებზეა დამოკიდებული — ექსპერტები ამას შერბილებული სავაჭრო პოლიტიკის მორიგ ნიშნად მიიჩნევენ.

პროგრესის მიუხედავად, ექსპორტზე შეზღუდვები კვლავ მოქმედებს იმ კომპანიებზე, რომლებიც სამხედრო სფეროს ემსახურებიან, რაც ამერიკულ თავდაცვით ინდუსტრიას პრობლემებს უქმნის.

ორივე მხარე აცხადებს, რომ შეთანხმების მიზანია ურთიერთგაგების გაღრმავება და ეკონომიკური ურთიერთობების გაჯანსაღება, თუმცა სრულმასშტაბიანი პრობლემების გადაწყვეტა ჯერ კიდევ პროცესშია.