ვენაში ქართველი პლასტიკური ქირურგი დააკავეს. როგორც ადგილობრივი მედია წერს, 58 წლის ქალი, რომელსაც პლასტიკური ოპერაცია 35 წლის ქართველმა ექიმმა ჩაუტარა, სერიოზულად დაშავდა.

ოპერაცია 2025 წლის 11 თებერვალს ნაქირავებ ბინაში ჩატარდა. სახეზე, კერძოდ, ნიკაპზე ჩატარებული ქირურგიული ოპერაცია პროკურატურის მიერ აღწერილია, როგორც "სისხლიანი და არაჰიგიენური", რომლისთვისაც პაციენტმა 1600 ევრო გადაიხადა.

ადგილობრივი მედია წერს, რომ ოპერაციის შემდეგ, ქალს დაეწყო გართულებული სუნთქვა. ქართველმა ექიმმა მას წამალი გაუკეთა, თუმცა ქალის მდგომარეობა გაუარესდა, სიცოცხლისთვის საფრთხისშემცველი მდგომარეობის გამო ის იძულებული გახდა, საავადმყოფოში წასულიყო, სადაც მას გადაუდებელი ოპერაცია ჩაუტარდა. სასწრაფო დახმარების თანამშრომლებმა დაზარალებულის სახეზე რამდენიმე სისხლდენა აღმოაჩინეს, რის შემდეგაც ისინი პოლიციას დაუკავშირდნენ.

ავსტრიული მედია ქართველი ექიმის ვინაობას არ ასახელებს, თუმცა ტელეკომპანია "ფორმულას" განცხადებით, ქართველი პლასტიკური ქირურგი, სავარაუდოდ, ზურაბ კეკელიაა. აღსანიშნავია, რომ ზურა კეკელიას სოციალური ქსელები 12-13 თებერვლის შემდეგ აქტივობა წყდება.

58 წლის ქალის მდგომარეობა ახლა სტაბილურია. ბრალდებული მედიასთან განცხადების გაკეთებაზე უარს ამბობდა.

Vienna.at-ზე დაყრდნობით, ნაფიცმა მსაჯულმა (თავმჯდომარე: მარკუს მიულერი) ქართველ პლასტიკურ ქირურგს სხეულის მძიმე დაზიანებისთვის 20 თვით თავისუფლების აღკვეთა მიუსაჯა, აქედან 16 თვე პირობითი სასჯელია, 4 თვე კი (თებერვლის შემდეგ) უკვე მოიხადა კეკელიამ პატიმრობა სასჯელაღსრულების დაწესებულებაში. ნაფიცი მსაჯულის თქმით, ექიმს, რა თქმა უნდა, არ ჰქონდა განზრახული ქალისთვის ზიანის მიყენება და მისი სინანული და აღიარება ასევე გათვალისწინებული იყო განაჩენში.