შინაგან საქმეთა სამინისტროში აცხადებენ, რომ სამართალდამცველებმა ტელეკომპანია რუსთავი-2-ის ვებ-გვერდზე განხორციელებული კიბერშეტევის ჩამდენი პირი გამოავლინეს. უწყების ცნობით, ის 1999 წელს არის დაბადებული და თეთრიწყაროს რაიონის მცხოვრებია.

პოლიციამ მისი საცხოვრებელი სახლის ჩხრეკისას ნივთმტკიცებად ამოიღო კომპიუტერული ტექნიკა, რომელზეც დანიშნულია შესაბამისი ექსპერტიზა.

19 სექტემბერს, ტელეკომპანია რუსთავი-2-ის ვებ-გვერდზე განხორციელებული კიბერშეტევის ფაქტზე გამოძიება საქართველოს სისხლის სამართლის კოდექსის 284-ე მუხლის 1-ლი ნაწილით დაიწყო, რაც კომპიუტერულ სისტემაში უნებართვო შეღწევას გულისხმობს.

დანაშაული სასჯელის სახით ითვალისწინებს ჯარიმას, გამასწორებელ სამუშაოს ორ წლამდე ვადით ან იმავე ვადით თავისუფლების აღკვეთას.

რუსთავი 2 საკუთარ ვებგვერდზე კიბერშეტევისა და მუქარის შესახებ ინფორმაცია ტელეკომპანიამ გაავრცელა. საინფორმაციო გამოშვების წამყვანის, თამარ ბაღაშვილის თქმით, შესაძლო კიბერშეტევის შესახებ ინფორმაციის მიღების შემდეგ, მათი საიტი გაითიშა.