ცნობილ ინგლისელ მომღერალ Jessie J-ს ძუძუს კიბოს დიაგნოზი დაუსვეს. ინფორმაციას თავად პოპვარსკვლავი ავრცელებს ინსტაგრამზე და ამბობს, რომ ყოყმანობდა, უნდა გაემხილა თუ არა თავისი ჯანმრთელობის მდგომარეობა საჯაროდ.

"თუმცა, მინდოდა, ჩემი ფანებისა და გულშემატკივრებისთვის ეს გამემხილა", — ამბობს მუსიკოსი ვიდეოში, — "ძუძუს კიბოს ადრეული სტადიის დიაგნოზი დამისვეს. ხაზს ვუსვამ და ვეჭიდები სიტყვა 'ადრეულს'. [...] ალბათ ვერანაირად დავგეგმავდი, დიაგნოზი მაშინ დაესვათ, როცა ახალ სიმღერებს ასეთი სახელებით ვუშვებ: No Secrets ("არანაირი საიდუმლო") და Living My Best Life ("საუკეთესოდ ვცხოვრობ")".

მუსიკოსი ამატებს, რომ თავისი სირთულეების გამხელა წინათ მათ დაძლევაშიც დახმარებია. ადამიანები სიყვარულთან და მხარდაჭერასთან ერთად თავიანთ ამბებსაც მიზიარებდნენო, ამბობს Jessie J.

"გულს მტკენს იმის ცოდნა, რომ უამრავ ადამიანს უწევს ამავეს და უარესის გადატანაც კი", — აღნიშნავს პოპვარსკვლავი.

15 ივნისს Jessie J-ის კონცერტზე გამოსვლა აქვს დაგეგმილი, ამის შემდეგ კი მუსიკოსი "მცირე ხნით გაუჩინარებას" და ოპერაციის გაკეთებას აპირებს. მკერდზე ოპერაციის გაკეთების როგორი დრამატული გზა ავირჩიეო, ხუმრობს იგი.

"გპირდებით, დიდი მკერდით და ახალი მუსიკით დაგიბრუნდებით", — ამატებს მომღერალი.

ვიდეოს კომენტარებში Jessie J-ს მხარდაჭერა არაერთმა პოპვარსკვლავმა გამოუცხადა, მათ შორის, კეტი პერიმ და რიტა ორამ.

ინგლისელი მუსიკოსი, რომლის მსოფლიო ჰიტებს შორისაა Price Tag და Flashlight, თავისი ჯანმრთელობის მდგომარეობის შესახებ ყოველთვის ღიად საუბრობდა. მუსიკოსს საჯაროდ ულაპარაკია გულის და ყურის თანდაყოლილ დაავადებებზე, ასევე მუცლის მოშლაზე და მენტალური ჯანმრთელობის პრობლემებზე.

ასევე იხილეთ: