თავდაცვის ყოფილი მინისტრის, ირაკლი ოქრუაშვილია ადვოკატმა, მამუკა ჭაბაშვილმა ტელეკომპანია "პირველის" ეთერში განაცხადა, რომ ოქრუაშვილის საქმე ხელოვნურადაა შეკერილი, სამართლებრივ ნორმებს სცდება და უფრო მეტად პოლიტიკური ანგარიშსწორებაა.

"თვითონ ძალიან მხნედ გამოიყურება, არ ნერვიულობს იმაზე, რომ საპატიმროშია. ეს მისი სამოქალაქო პოზიცია იყო და ამ სამოქალაქო პოზიციიდან დამდგარი შედეგი. კარგად მოგეხსენებათ, რომ ის ბოლო წლებია პოლიტიკურად აქტიური აღარ არის და პოლიტიკას ჩამოშორებული იყო, მაგრამ სამოქალაქო პოზიცია, რა თქმა უნდა, გააჩნდა.

მან დამაბარა ასეთი რამ: მას სხვანაირად არ შეეძლო გამოეხატა სოლიდარობა, ქალბატონი მზია ამაღლობელის მიმართ და 50-ზე მეტი პოლიტპატიმრის მიმართ, გარდა იმასა, რომ უარი ეთქვა პარლამენტში კომისიაზე მისვლაზე და შემდეგ უკვე გირაოს არ გადაეხადა. ეს იყო მისი სოლიდარობა პოლიტპატიმრებისთვის", — თქვა ადვოკატმა.

თეა წულუკიანის კომისიაზე გამოუცხადებლობის გამო დაკისრებული ჯარიმის გადაუხდელობისთვის თავდაცვის ყოფილი მინისტრი, ირაკლი ოქრუაშვილი 14 მაისს სასამართლო დარბაზში დააკავეს.

8 აპრილს ოქრუაშვილს ოცნების პარლამენტის დროებით საგამოძიებო კომისიაზე გამოუცხადებლობის გამო აღკვეთის ღონისძიების სახით 20 000-ლარიანი გირაო შეეფარდა და საქმის წარმოების დასრულებამდე საქართველოს საზღვრის კვეთა აეკრძალა. ოქრუაშვილს გირაოს გადახდის ვადად 30 დღე ჰქონდა განსაზღვრული. ვადა 8 მაისს ამოიწურა. დღევანდელ პროცესზე პროკურატურამ დააყენა შუამდგომლობა, რომ აღკვეთის ღონისძიება პატიმრობით შეცვლილიყო.

ირაკლი ოქრუაშვილს ბრალი სისხლის სამართლის კოდექსის 349-ე მუხლით წარედგინა, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს. ეს ქმედება ისჯება ჯარიმით ან თავისუფლების აღკვეთით ვადით ერთ წლამდე, თანამდებობის დაკავების ან საქმიანობის უფლების ჩამორთმევით — ვადით სამ წლამდე.

ამავე საქმეზე ბრალი უკვე წაუყენეს და აღკვეთის ღონისძიებად გირაო შეუფარდეს შემდეგ პოლიტიკოსებს: ნიკა მელიას (50 000 ლარი) მამუკა ხაზარაძესა და ბადრი ჯაფარიძეს (50 000-50 000 ლარი), გივი თარგამაძეს (10 000 ლარი), ზურა ჯაფარიძეს (20 000 ლარი), გიორგი ვაშაძეს (50 000 ლარი), ნიკა გვარამიას (30 000 ლარი).