რუსეთის საგარეო საქმეთა მინისტრმა სერგეი ლავროვმა, უკრაინის პრეზიდენტ ვოლოდიმირ ზელენსკის, თურქეთში პუტინის ჩასვლის მოთხოვნის გამო "საცოდავი ადამიანი" უწოდა.

"თავდაპირველად, ზელენსკი მოითხოვდა, რომ პუტინი პირადად ჩასულიყო. ჰო, საცოდავი ადამიანია. მერე კი უფროსმა მეგობრებმა აუხსნეს, რომ ასე სულელურად არ უნდა იქცეოდეს და საჭიროა მოლაპარაკებების გამართვა," — თქვა ლავროვმა.

15 მაისს სტამბოლში დაგეგმილ რუსულ-უკრაინულ მოლაპარაკებაზე უკრაინის პრეზიდენტი ვოლოდიმირ ზელენსკი წარმომადგენლობითი დელეგაციით ჩავიდა. რაც შეეხება რუსულ მხარეს, დელეგაციაში არც ერთი მინისტრი არ არის წარმოდგენილი და მოლაპარაკებებში არც პუტინი იქნება ჩართული.

უკრაინის პრეზიდენტმა, ვოლოდიმირ ზელენსკიმ თქვა, რომ მისი ჩამოსვლა თურქეთში უკვე არის მესიჯი რუსი დიქტატორი ვლადიმერ პუტინისთვის.

15 მაისს, ანკარას აეროპორტიდან გასასვლელში, ჟურნალისტებმა უკრაინელ ლიდერს ჰკითხეს, ჰქონდა თუ არა მას რაიმე სახის მესიჯი რუსი დიქტატორისთვის.

"მე აქ ვარ. ვფიქრობ, რომ ეს ძალიან მკაფიო მესიჯია", — უპასუხა ზელენსკიმ.