20 წლის სტუდენტი, ნატა ჭიოკაძე "ტვ პირველთან" ყვება, რომ 21 აპრილს, პარლამენტთან მიმდინარე საპროტესტო აქციაზე გაიგო როგორ ანიშნა რონი მესხმა სხვა პოლიციელებს ახალგაზრდა კაცის დაკავების შესახებ. ამის შემდეგ, ის შეეცადა, რომ დაკავებისთვის ხელი შეეშალა, რა დროსაც მესხი მას თმაში სწვდა.

"როდესაც დაიწყეს აქციის დაშლა და ქალების გადაყვანა ტროტუარის მეორე მხარეს, მე გადმოვედი მუზეუმის მხარეს და გავიგონე, როგორ ანიშნა რონი მესხმა, რომ დაეკავებინათ ეს კაცი. ვიფიქრე, გავაგდებდი, ვიდრე პოლიცია მოვიდოდა და დააკავებდა. ვიდრე ამას ვცდილობდი, თმაში მწვდა 20 წლის გოგოს პოლიციელი. არ ვიცნობდი ამ ადამიანს. ვუთხარი, შენზე ანიშნეს და გვერდზე გადავსულიყავით და ხალხში გავრეულიყავით. არ ვაპირებ მივმართო საგამოძიებო უწყებას. ცხადია არ ვენდობი. თავის გასჭირვებია ამ კაცს, 20 წლის კაცს თმით ითრევს რუსთაველზე", — ამბობს ნატა ჭიოკაძე "ტვ პირველის" ჟურნალისტთან საუბრისას (სტილი დაცულია).

შემთხვევა გუშინ, 21 აპრილს საპროტესტო აქციაზე მოხდა. აქციის მონაწილის დაკავებაში ხელის შეშლის გამო პოლიციელმა ახალგაზრდა ქალზე იძალადა. ამ დრომდე საგამოძიებო უწყებებს მომხდარზე გამოძიება არ დაუწყიათ და არც მოქალაქეზე ძალადობაში სავარაუდო ეჭვმიტანილი დაუბარებიათ დაკითხვაზე.

20-21 აპრილს პოლიციამ საპროტესტო აქციებზე 5 პირი დააკავეს. ისინი სხვადასხვა იზოლატორებში იმყოფებიან. ჯერჯერობით უცნობია როდის ჩატარდება მათი სასამართლო პროცესები.