პრობლემური რეპუტაციის მქონე მსახიობი არმი ჰამერი, რომელსაც კინომოყვარულთა უმრავლესობა ფილმ Call Me By Your Name-ში მონაწილეობით იცნობს, თავისი პირადი ცხოვრებიდან აქამდე უცნობ ამბავს იხსენებს.

ჰამერი სულ ახლახან სტუმრად იყო მიწვეული ერთ-ერთ პოდკასტში, სადაც მოჰყვა, როგორ სცადა სექსუალური ურთიერთობის დამყარება კაცთან, მაგრამ მცდელობამ ვერ გაამართლა.

"ერთხელ ვცადე, კაცთან მქონოდა სექსი და ეს ძალიან კომიკური შემთხვევა იყო", — იხსენებს მსახიობი, — "ვიფიქრე, ქალები საშინლები არიან, გეი კაცებთან კი ყველაფერი უფრო მარტივადაა-მეთქი".

ამის შემდეგ ჰამერმა სტერეოტიპული მაგალითი მოიყვანა, თუ როგორ ადვილად შეიძლება გეი კაცთან ინტიმური ურთიერთობის დამყარება.

"ამიტომაც, ვფიქრობდი, მოდი, ვცდი, იქნებ გამიმართლოს-მეთქი", — აგრძელებს მსახიობი, — "ერთი სიმპათიური ფრანგი ტიპი გავიცანი და მეგონა, ურთიერთობა გამომივიდოდა. თუმცა, საქმე რომ სექსზე მიდგა, ჯერ წვერი მომხვდა ცუდად და ვიფიქრე, აი, რატომ მოსწონთ ქალებს, როცა იპარსავ-მეთქი. მკლავების შემოხვევაც ვცადე, მაგრამ მხრები აღმოჩნდა ძალიან განიერი. თითქმის ჩემი სიმაღლის იყო. ეს შემთხვევა კი ძალიან უცნაური გამოდგა; ფიზიკურად სულ არაფერი არ მიგრძნია".

ფოტო: Jason LaVeris / FilmMagic

პოდკასტში ჰამერმა ასევე ისაუბრა ნივთიერებებზე დამოკიდებულებაზე, რეაბილიტაციასა და ჰოლივუდურ ცხოვრებაზე. მსახიობს ჰოლივუდის დატოვება 2021 წელს მოუწია — მას შემდეგ, რაც გაუპატიურებაში დაადანაშაულეს.

მსახიობმა ბრალდებები უარყო და თქვა, რომ მისი ურთიერთობები ურთიერთთანხმობას ეფუძნებოდა, მაგრამ მოგვიანებით აღიარა, რომ ბრალმდებელ პარტნიორებზე ფსიქოლოგიურად ძალადობდა. საქმეზე დაიწყო გამოძიებაც, მაგრამ ჰამერს არასაკმარისი მტკიცებულებების გამო ბრალი არ წარედგინა.

სკანდალის ფონზე, მსახიობთან საქმიანი ურთიერთობა გაწყვიტა მისმა აგენტმა. გაუქმდა რამდენიმე პროექტიც, რომელშიც ჰამერი იყო ჩართული. გახმაურებულ ბრალდებებზე კი გადაიღეს დოკუმენტური ფილმი House of Hammer, რომელიც 2022 წელს გამოვიდა.