"გიორგი გვიმრაძემ ძველი თანამდებობა ახალი პოზიციით მყისიერად ჩაანაცვლა", — ინფორმაციას პლატფორმა მაყურებელი ავრცელებს.

საზოგადოებრივი მაუწყებლიდან გამოთხოვილ ინფორმაციაზე დაყრდნობით, "მაყურებელი" წერს, რომ 3 დეკემბერს გვიმრაძე საზოგადოებრივი მაუწყებლის ახალი და მიმდინარე ამბების დირექტორის თანამდებობიდან გადადგა, თუმცა ამავე დღეს არხის ანალიტიკური სამსახურის უფროსად დაინიშნა.

"გიორგი გვიმრაძე საზოგადოებრივი მაუწყებლის ახალი და მიმდინარე ამბების დირექტორის პოზიციას 2015 წლიდან იკავებდა და თანამდებობიდან მას შემდეგ გადადგა, რაც პირველი არხის ეთერში გვიმრაძის დეზინფორმაციული ხასიათის ინტერვიუ გავიდა გაურკვეველი სტატუსის მქონე კიმბერლი ლოუსთან.

ამ ინტერვიუმდე რამდენიმე დღით ადრე კი გიორგი გვიმრაძემ მაუწყებელთან საპროტესტო აქციაზე მისულ 2 ქალს: ჟურნალისტ ნინია კაკაბაძეს — ფიზიკური, აქტივისტ დოდი ხარხელს კი — სიტყვიერი შეურაცხყოფა მიაყენა.

გვიმრაძის გადადგომიდან და ახალ პოზიციაზე დანიშვნიდან თითქმის ორი თვე გავიდა, თუმცა, პირველი არხის ვებგვერდზე დირექტორთა საბჭოს წევრების შესახებ ინფორმაცია კვლავ არ განახლებულა და გიორგი გვიმრაძე კვლავ საზოგადოებრივი მაუწყებლის ახალი და მიმდინარე ამბების დირექტორის სტატუსს ატარებს.", — წერია "მაყურებლის" მიერ გავრცელებულ ინფორმაციაში.