პოლიტოლოგ ლევან ლორთქიფანიძეს ქუჩის უკანონო გადაკეტვას ედავებიან. ინფორმაციას ლევან ლორთქიფანიძე სოციალურ ქსელში ავრცელებს.

"სასამართლოში ვარ გამოძახებული. მედავებიან ქუჩის უკანონო გადაკეტვას, 28 დეკემბერს ჩაჩავას სამშობიარო სახლთან დამიბლოკავს მოძრაობა. შეიძლება აქციის ორგანიზატორობა და ლიდერობაც დამბრალდეს. სპეციალისტებმა მითხრეს, რომ სამი სახის სანქცია შეიძლება გამოიყენონ ჩემ წინააღმდეგ:
ა) 500 ლარიანი ჯარიმა;
ბ) 5000 ლარიანი ჯარიმა;
გ) ორკვირიანი ადმინისტრაციული პატიმრობა." — წერს ლევან ლორთქიფანიძე.

პოლიტოლოგი იმ კონკრეტულ დღეს იხსენებს, როდესაც მარშში მონაწილეობა მიიღო და ხაზგასმით აღნიშნავს, რომ კანონთან პრობლემები არასდროს ჰქონია. ლორთქიფანიძე ამბობს, რომ ორჯერ დაიძაბა ვითარება პოლიციასთან, ორჯერ გაიარეს აქციის მონაწილეებმა ბეწვის ხიდზე და ორივეჯერ მიიღო სიტუაციის განმუხტვაში მონაწილეობა.

"ვინც მიცნობთ, ყველამ იცით — ავტობუსშიც კი არ დავუჯარიმებივარ არავის, ძალიან კანონმორჩილი მოქალაქე ვარ. ქუჩები იმ დროსაც გადამიკეტავს, როდესაც ვანო მერაბიშვილი და ბაჩო ახალაია იყვნენ შს მინისტრები, მაგრამ არავის გამოვუძახებივარ თემიდასთან. საჯარო სივრცეში არავისთვის ხელი არ მომიქნევია, არავისთვის შემიგინებია... ღმერთმა დამაჯილდოვა ასეთი ნიჭით — შემიძლია ხელის მოქნევის, ბილწსიტყვაობის გარეშე უმწვავესად გავაკრიტიკო, გავლანძღო ადამიანი, ინსტიტუტი. აგრესიას ჩემი სიტყვების ხვეულებით გამოვხატავ და არა ხავილითა თუ მუშტი-კრივით.
მოკლედ, არანაირი მიზეზი, იოტისოდენა საბაბიც კი არასდროს არ მიმიცია პოლიციელებისთვის, მაგრამ მაინც ამომიღეს მიზანში... ყველა ვინც ოდნავ აქტიურია, უნდა შებოჭონ, რადგან საქმე გვაქვს შეურაცხადი ხალხის მიერ მართულ ავტორიტარიზმთან.", — წერს ლევან ლორთქიფანიძე.

ის აცხადებს, რომ ხელისუფლება საბაბს ეძებს, რომ სრულიად უწყინარი აქციის გამო ადამიანები ადმინისტრაციული წელით გაასამართლოს.

"ჩვენც ბევრნი ვიყავით იმისთვის, რომ ისედაც პარალიზებულ ქალაქში 10 წუთით ქუჩა გადაგვეკეტა... სრულიად ჩვეულებრივი, უწყინარი აქციის გამო სურთ ჩვენი ადმინისტრაციული წესით გასამართლება, შეშინება, დასჯა, რათა შევფერხდეთ. ეს სიგიჟეა! სიმდაბლეა!
პირიქით მოხდება!
ხელისუფლების მომხრე ჩემს ყოფილ მეგობრებს გილოცავთ! თქვენმა საყვარელმა მთავრობამ ჩემი სახით ამ ქვეყნის დამაქცევარი, კანონდამრღვევი გამოიჭირა და სჯის!", — წერს ლევან ლორთქიფანიძე.