დარბაზის შეცვლაზე უარის თქმის საფუძველი არ არსებობდა, — ამის შესახებ პროევროპულ აქციებზე დაკავებული ვეფხია კასრაძის ადვოკატმა, არჩილ ჭავჭანიძემ ტვ პირველთან პროტესტის ნიშნად სხდომათა დარბაზის დატოვების შემდეგ განაცხადა.

"თვითონ მოსამართლემ ვერ მიიღო გადაწყვეტილება, რომ დარბაზი შეეცვალა. ფაქტობრივად, ფიზიკურად შეუძლებელი იყო ყოფნა და სუნთქვა, ერთ-ერთი ბრალდებული გახდა ცუდად, გამოვიძახეთ სასწრაფო დახმარების ბრიგადა. ბრიგადამ პაციენტი გასინჯა და უთხრა, რომ უჟანგბადობის გამო გახდა ცუდად. ეს ცნობა მოსამართლეს წინ ედო. ამ ახალი გარემოების გამოვლენის მიუხედავად, მან დარბაზი არ შეცვალა. დარბაზის შეცვლაზე უარის თქმის საფუძველი არ არსებობდა. მოსამართლემ ყველაფერი უნდა გააკეთოს, რომ პროცესში მონაწილე პირების ღირსება და პატივი არ შეილახოს. დღეს პროცესზე ბრალდებულების ღირსება და პატივი ვერ იქნა დაცული, მათ შორის, ვერც ადვოკატების, რომ ჩვენი პროფესიული საქმიანობის განხორციელების საშუალება გვქონოდა. არ მოგვეცა საშუალება, რომ აღმკვეთ ღონისძიებასთან დაკავშირებით ჩვენი პოზიცია დაგვეფიქსირებინა. ახლა არის ერთი კაცის სასამართლო, როდესაც მოსამართლე და პროკურორები სხედან და ამ საქმეს იხილავენ. ეს არის შემთხვევა, რომ სასამართლო ასე უხეშად არღვევს ადამიანის უფლებებს, ღირსებასა და პატივს და თვითონ მოსამართლემ ვერ მიიღო გადაწყვეტილება, დარბაზი შეეცვალა", — განაცხადა არჩილ ჭავჭანიძემ.

თბილისის საქალაქო სასამართლოში მიმდინარე პროევროპულ აქციებზე დაკავებული 8 პირის სასამართლო პროცესზე ერთ-ერთი მსჯავრდადებული შეუძლოდ გახდა. მისი ცუდად გახდომის მიზეზი უჰაერობა გახდა. ადვოკატები აცხადებენ, რომ სხდომა პატარა დარბაზში ტარდება და მოსამართლეს დარბაზის შეცვლის მოთხოვნით მიმართეს, რაზეც უარი მიიღეს, სწორედ ამის გამო, პროტესტის ნიშად, დატოვეს ადვოკატებმა სხდომათა დარბაზი.