"დღეს მივიღეთ გაცილებით მახინჯი სისტემა, ვიდრე შეიძლება 2012 წლამდე პერიოდში იყო", — ამის შესახებ რადიო თავისუფლებასთან ინტერვიუში შსს-ს განსაკუთრებულ დავალებათა დეპარტამენტის ყოფილი მაღალჩინოსანი, ირაკლი შაიშმელაშვილი ამბობს.

ჟურნალისტის კითხვაზე — თამამად შეუძლია თუ არა იმის თქმა, რომ ეს სისტემა გაცილებით მახინჯია, ვიდრე 2012 წელს იყო, შაიშმელაშვილი პასუხობს:

"გაცილებით მახინჯია, იმიტომ რომ ესენი არანაირ კანონზომიერებას არ ექვემდებარებიან, აქციის მონაწილე საუბრობდა, რომ სახელმწიფო აქციეს "ბეზპრიდელადო". ზუსტად ასეთია ახლა სახელმწიფო", — აცხადებს შაიშმელაშვილი.

როგორც ინტერვიუდან გახდა ცნობილი, მან ოჯახთან ერთად ქვეყანა 23 დეკემბერს დატოვა, ფოტო აეროპორტიდან კი მოგვიანებით გამოაქვეყნა. ირაკლი შაიშმელაშვილი ამჟამად აშშ-ში იმყოფება და მზადაა გააგრძელოს რეჟიმის მხილება.

ირაკლი შაიშმელაშვილი ინტერვიუში ამბობს, რომ ჯერ კიდე შარშან ფიქრობდა სამსახურიდან წამოსვლაზე. სჯერა, რომ დიდხანს ყოფნა აქ, აშშ-ში არ მოუწვეს. "ბუნებრივია, ჩემი ბოლო გაჩერება საქართველო იქნება", — ამბობს ირაკლი შაიშმელაშვილი.

26 დეკემბერს ფეისბუქზე გამოქვეყნებულ პოსტში, რომელსაც ოჯახის წევრებთან ერთად გადაღებული ფოტო აქვს დართული, მადლობას უხდის ყველას მხარდაჭერისთვის.

"ამ ეტაპზე მინდა შემოვიფარგლო მხოლოდ მადლობით. გიორგი ჩიკვაიძე, სალომე ზურაბიშვილი, აშშ-ის საელჩოს. განსაკუთრებული მადლობა იმ უცხო ადამიანებს, რომლებმაც წარმოუდგენელი მხარდაჭერა და სიყვარული გამოხატეს. იმედი მაქვს, რომ მომეცემა შესაძლებლობა ეს პატივისცემა ღირსეულად გადავიხადო. P.S. მალე დაგიბრუნდებით", — წერს შაიშმელაშვილი.