ოცნების პარლამენტის თავმჯდომარემ, შალვა პაპუაშვილმა დღევანდელ ბრიფინგზე კომენტარი გააკეთა პროევროპულ აქციებზე, რომელიც საქართველოში 28-დღეა იმართება და აღნიშნა, რომ ექსპრეზიდენტ მიხეილ სააკაშვილს ეთანხმება იმაში, რომ "ხალხს თუ გამოიყვან, შედეგიც უნდა დადო".

პაპუაშვილის თქმით, ოპოზიციონერები შედეგს იმიტომ ვერ დებენ, რომ "სინამდვილეში ხალხი მათ არ მიჰყვება, ხალხმა დიდი ხანია მათ აქცია ზურგი".

"გაგიკვირდებათ და ვეთანხმები მიხეილ სააკაშვილს, ხალხს თუ გამოიყვან, შედეგიც უნდა დადო. ხალხს თუ ჩამოიყვან, აწვალებ, დააორგანიზებ და მოიყვან, შედეგიც უნდა დადო, მაგრამ ვერ დებენ შედეგს მარტივი რაღაცის გამო — იმიტომ, რომ ხალხი სინამდვილეში აბსოლუტურად სხვაგან არის, ვიდრე მათ ჰგონიათ, რომ უნდა იყვნენ. ხალხი სინამდვილეში მათ არ მიჰყვება, ხალხმა დიდი ხანია უკვე აქცია ზურგი და სულ ბოლოჯერ ეს იყო 26 ოქტომბერს, როდესაც ქართველმა ხალხმა მათ კიდევ ერთხელ უთხრა, რომ პოლიტიკურ ძალას, რომლის მთავარი პირობა არის ის, რომ ის ქვეყანას სხვა ქვეყნების ვასალად აქცევს, საქართველოში არასდროს ექნება სახელისუფლებო მანდატი", — განაცხადა პაპუაშვილმა.

შეგახსენებთ, მიხეილ სააკაშვილმა 22 დეკემბერს სოციალურ ქსელში პოსტი გამოაქვეყნა, სადაც წერს, რომ ამდენი ხალხის გამოყვანა და გამარჯვების გარეშე უკან გაშვება — შეცდომაა.

მოგვიანებით, აღნიშნულმა პოსტმა საზოგადოების აღშფოთება გამოიწვია, რადგანაც სააკაშვილის პოსტი ხაზს უსვამდა იმ ფაქტს, რომ აქციებს, რომელიც რუსთაველზე 28 დღის განმავლობაში იმართება, ვინმე აორგანიზებს, რის გამოც ყოფილმა პრეზიდენტმა მოგვიანებით პოსტში შესწორებები შეიტანა:

"შეცდომაა ამდენი ხალხის გამოსვლა და გამარჯვების გარეშე უკან გაშვება.

პ.ს. სამწუხაროდ, ჩემი სიტყვიერი დანაბარების არასწორად დაპოსტვა მოხდა და შესაბამისად ჩემმა ამ პოსტმა გამოიწვია დამსახურებული რეაქცია.

რა თქმა უნდა, ხალხი საკუთარი ნებით გამოდის და აპროტესტებს.

ჩემი მიზანი იყო, ხაზი გამესვა შთამბეჭდავი მსვლელობისათვის და ხელშესახები შედეგების დადგომის აუცილებლობისათვის", — დაწერა მიხეილ სააკაშვილმა Facebook-ზე.