პატივცემულო არჩეული პრეზიდენტო, ჩემი და ჩემი ხალხის სახელით გულწრფელად ვულოცავ თქვენს აღმატებულებას საქართველოს პრეზიდენტად არჩევას, — თურქეთის რესპუბლიკის პრეზიდენტი რეჯეფ თაიფ ერდოღანი ოცნების არჩეულ პრეზიდენტს, მიხეილ ყაველაშვილს პრეზიდენტად არჩევას ულოცავს.

"პატივცემულო არჩეული პრეზიდენტო, ჩემი და ჩემი ხალხის სახელით გულწრფელად ვულოცავ თქვენს აღმატებულებას საქართველოს პრეზიდენტად არჩევას, რომელთანაც ახლო მეზობლობა და სტრატეგიული პარტნიორობა გვაკავშირებს და ასევე გისურვებთ წარმატებებს ამ საპატიო მოვალეობის შესრულებაში.

სრულიად დარწმუნებული ვარ, რომ თქვენი უფლებამოსილების ვადაში კიდევ უფრო განვავითარებთ ჩვენს ქვეყნებს შორის არსებულ მეგობრულ ურთიერთობასა და მჭიდრო თანამშრომლობას, რაც თანხვედრაშია ჩვენს საერთო ინტერესებთან და ემსახურება რეგიონში კეთილდღეობის უზრუნველყოფას.

მინდა ვისარგებლო შემთხვევით, რათა კვლავ გადმოგცეთ საუკეთესო სურვილები, თქვენს აღმატებულებას ვუსურვო ჯანმრთელობა და კეთილდღეობა, ხოლო საქართველოს, მეგობარ ხალხს — აღორძინება და ბედნიერება", — ნათქვამია მისალოც წერილში.

ოცნების ერთკანდიდატიან არჩევნებში ყაველაშვილისთვის გამარჯვება არ მიულოცავს ევროკავშირის ლიდერების უმრავლესობას. მან მილოცვები მიიღო სომხეთის პრემიერმინისტრის, ნიკოლ ფაშინიანისა და პრეზიდენტის, ვაჰაგნ ხაჩატურიანისგან, ბელარუსის ავტორიტარი ლიდერის, ალიაქსანდ ლუკაშენკოსგან და სერბეთის პრეზიდენტის, ალექსანდარ ვუჩიჩისგან.

შეგახსენებთ, რომ ოცნების ერთკანდიდატიან საპრეზიდენტო არჩევნებში ყაველაშვილმა 14 დეკემბერს გაიმარჯვა. მისი ინაუგურაცია 29 დეკემბერსაა დაგეგმილი.