რამდენიმე დღის წინ შექმნილ პლატფორმაზე Freebusiness.ge თავისუფალი ბიზნესების განცხადებას უკვე 2 200-ზე მეტი ხელმომწერი ჰყავს. ხელმომწერები ქვეყანაში შექმნილი კრიზისის განსამუხტად ახალი არჩევნების დანიშვნასა და ბოლო პერიოდის საპროტესტო აქციებზე დაკავებული ადამიანების ახალ წლამდე გათავისუფლებას მოითხოვენ. განცხადების მხარდამჭერებს შორისაა ქართული საგამომცემლო ინდუსტრიის არაერთი წარმომადგენელიც.

23 დეკემბრისთვის, თავისუფალი ბიზნესების განცხადებას შემდეგი გამომცემლობები შეუერთდნენ:

  • სულაკაურის გამომცემლობა
  • გამომცემლობა ინტელექტი
  • ქარჩხაძის გამომცემლობა
  • გამომცემლობა არტანუჯი
  • გამომცემლობა მედუზა
  • გამომცემლობა პოლინომიალი
  • გამომცემლობა ზიარი
  • გამომცემლობა პეგასი
  • გამომცემლობა გრიფონი
  • ჩემი გამომცემლობა
  • გამომცემლობა ფანქარი
  • გამომცემლობა ლოგოს პრესი
  • გამომცემლობა სიესტა
  • მთარგმნელების გამომცემლობა
  • გამომცემლობა მინიატურა
  • გამომცემლობა ცხელი შოკოლადი

"არსებული კრიზისი გასცდა პარტიული პოლიტიკის საზღვრებს და გარდაუვალი სოციალური და ეკონომიკური საფრთხის წინაშე აყენებს ქვეყანას", — ნათქვამია თავისუფალი ბიზნესების განცხადებაში, — "აუცილებელია ვითარების სასწრაფო დეესკალაცია. დეესკალაციის ყველაზე პრაგმატული გზა არის ახალი არჩევნების დანიშვნა და ბოლო პროცესების დროს დაპატიმრებული ადამიანების ახალ წლამდე გათავისუფლება. ჩვენ, ქართული ბიზნესის წარმომადგენლები, ვართ რა პასუხისმგებელნი ქვეყნის ბედზე და მის შეუქცევად განვითარებაზე, განურჩევლად ჩვენი პოლიტიკური პრეფერენციებისა, ხელს ვაწერთ ამ მოწოდებას და განცხადებას".

2 200-ზე მეტი ბიზნესის ხელმოწერასთან ერთად, ამ დროისთვის მუშავდება 650-მდე განცხადება.

პლატფორმა Freebusiness.ge 15 დეკემბერს შეიქმნა 60-ზე მეტი ბიზნესის განცხადების გასავრცელებლად. მას შემდეგ ვებგვერდზე ბიზნესსფეროს ნებისმიერ წარმომადგენელს შეუძლია განცხადებას შეუერთდეს, მომხმარებელს კი აქვს შესაძლებლობა, რომელიმე კომპანიისგან მოითხოვოს პოზიციის დაფიქსირება.